Einar fékk meira hár en Baldur

Í nýjasta þætti hlaðvarpsins Einmitt snýr Einar hlutverkunum við og tekur sæti í viðtalsstólnum ásamt Baldri. Gestaþáttastjórnandi þáttarins og  fjölmiðlamaðurinn Ásgeir Kolbeinsson, leiðir samtalið og ræðir við þá félaga um ferlið, allt frá fyrstu vangaveltum og ákvörðunartöku, yfir í undirbúning og framkvæmd aðgerðarinnar, og fram til dagsins í dag.

Miklar framfarir á stuttum tíma

Aðspurðir um ástæðuna fyrir því að velja aðgerðina í Tyrklandi frekar en annars staðar, segir Einar að Baldur hafi kynnst tyrkneskum manni búsettum hér á landi, sem hafi farið að ræða málið nánar við þá.

Að sögn Einars fara um 95 prósent einstaklinga, sem fara í  slíkar aðgerðir, til Tyrklands þar sem þeir eru framar öðrum í faginu og bjóða upp á hagstæðari kjör.

Baldur segir að miklar framfarir hafi orðið í greininni, en fyrir um tíu til tólf árum hafi tilfelli komið upp þar sem fólk lést vegna þess að meðferðin var þá stórt og umfangsmikið inngrip.

Þá segist hann hafa skoðað rándýra stofu sem stjörnurnar úti í heiminum hafa farið á en þegar hann fór að skoða umsagnir gesta benti það til til að þjónustan þar væri ekki eins góð og virtist við fyrstu sýn.

„Það sem Tyrkland hefur og hjálpar þeim er auðvitað ferðaþjónustan. Þetta er orðinn iðnaður þar, þar sem um þúsund aðgerðir eru gerðar á dag. Þeir hafa gert sér grein fyrir því að þeir fá túristann inn til að greiða fyrir þessa þjónustu. Hérna er enginn að gera þetta, þetta enn of dýrt og kannski of fáir myndu hoppa í þetta. þarna er þetta bara iðanður,“ segir Baldur og bætir við:

„Allir þeir sem ég hef rætt við sem hafa farið þarna segja að þetta sé bara legit, en það skiptir miklu að velja rétt, því það eru líka margir fávitar þarna.“

Einar segir að hann hafi sérstaklega notið góðs af því að Baldur hafi lagt mikla vinnu í að kynna sér málin. 

Fagleg þjónusta og umfangsmikil aðgerð

Einar og Baldur mættu á klíníkuna klukkan níu um morguninn og voru búnir um hálf átta um kvöldið. Sami læknirinn stýrði báðum aðgerðum, en tveir og tveir unnu saman í teymi.

„Aðgerðin hefst á því að fjarlægja hársekkina aftan á hnakkanum, sem tekur um tvo til þrjá tíma,“ segir Einar og bætir við: „Flestir spyrja hvort þetta sé vont. Það er ekki beint vont, en mjög óþægilegt í um fimmtán mínútur á meðan deyfingin fer að virka. Eftir það finnurðu lítið sem ekkert, aðeins smá tog eða krukkun.“ Hársekkirnir eru síðan geymdir í skálum áður en haldið er í seinni hlutann eftir hádegishlé.

Þá er farið yfir stöðuna og haldið áfram með sjálfa ígræðsluna. Baldur fékk grætt um 4000 hár úr hliðum og aftan á hnakka, en Einar fékk tilfærslu á 4800 hárum til að þétta hárið betur.

„Þetta var helvítis törn,“ segir Baldur, en bætir við að þeir hafi lítið fundið fyrir því þar sem starfsfólkið hugsaði vel um þá.

Einar og Baldur dvöldu í Tyrklandi í fimm daga og mæla eindregið með því frekar en þriggja daga ferð. Þeir leggja áherslu á að ekki borgi sig að spara á röngum stöðum.

„Það eru vissulega ódýrari pakkar í boði, til dæmis án plasma-meðferðar og annarra meðferða sem skipta máli,“ segir Baldur. 

Spurðir út í kostnaðinn segir Einar að hann hafi upphaflega talið að slík ferð og aðgerði myndi kosta eina til tvær milljónir íslenska króna, eins og algengt sé í löndunum hér í kring.

„Pakkinn sem við völdum kostaði 580 þúsund krónur. Við bættu svo hvor um sig við flugmiða,“ segir hann.

Þáttinn má heyra í held sinni hér að neðan: