Rak í roga­stans þegar hann las við­talið við Bubba

Í vikunni var Bubbi til viðtals hjá fréttastofunni vegna tímamótasamnings sem hann gerði við Öldu Music, sem kveður á um að fyrirtækið eignist allt höfundarverk Bubba frá 1980 og réttinn til að nýta nafn hans og líkindi hans til allrar framtíðar eftir að hann fellur frá.

Í viðtalinu lýsti hann yfir miklum áhyggjum af framtíð tónlistarbransans og gervigreind. 

„Það er óveður á leiðinni, óveður á leiðinni í tónlistarbransanum og það er miklu stærra og alvarlegra en fólk heldur. Fólk borgar jú til að sjá tónlistarmenn, svo segir það við börnin sín, sjáðu þetta er í alvörunni, hann er úr holdi og blóði, hann er að spila á gítar og hann er að spila á munnhörpu, þetta gæti gerst og er jafnvel á leiðinni, nei takk, nei takk, nei takk,“ sagði Bubbi.

Framkvæmdastjóri STEF tók undir að mörgu leyti og sagði að um væri að ræða stærstu áskorunina sem tónlistarmenn standa frammi fyrir.

Eins og að gagnrýna autopilot í flugvélum

Geir Ólafs hefur aðra sýn á þessa þróun og segir að ekki megi tala tæknina svona niður.

„Tæknin í músikbransanum, henni hefur fleygt þannig fram að hún er orðin mjög auðveld í notkun fyrir fólk sem kann að fara með hana.“

„Hvað varðar listina að semja lög, hafa sans fyrir því, það gerir það enginn fyrir þig. Ef að þú gerir það sjálfur ert þú að gera það að þínu,“ segir Geir.

Þá fer Geir að tala um að tæknin hafi lengi aðstoðað fólk við gerð tónlistar.

„Það eru til, og hafa verið til í áratugi tónlistarforrit þar sem þú getur tekið strengjasveit, sinfóníuhljómsveit, eða verið með trommuheila, trommusampler, þar sem alvöru trommarar eru á bak við.“

„Þetta hefur verið í þróun í mörg ár, sérstaklega í þessum tónlistarforritum sem menn nota þegar þeir útsetja. Til dæmis Síbelíus, ef þú stendur á gati í útsetningum, þá spyrðu bara Síbelíus og hann kemur með hundrað tillögur.“

Í framhjáhlaupi nefnir Geir að hann sé með Eurovision-lag í undirbúningi.

„Þetta er löngu byrjað, fyrir löngu síðan. Þetta er búið að vera í svo mikilli þróun. Það gengur ekki að koma fram og gagnrýna tæknina, það er bara eins og að gagnrýna að autopilot sé í flugvélum.“

„Þetta er notað til að hjálpa manni að skapa, fá hugmyndir,“ segir Geir.

Hann kveðst þó sjálfur ekki nota gervigreind til að hjálpa sér að semja lög.

„Maður hefur reynt að nota þetta til að fá hugmyndir en það hefur aldrei heillað mig. Það sem hefur heillað mig er að ég hef gert þetta sjálfur.“

„Það má ekki tala niður gervigreindina með þessum hætti. Að það sé verið að ráðast á listgreinina ... það mun aldrei taka frá fólki sköpunargáfuna. Þú hefur hana eða hefur hana ekki.“

„Það er algjörlega af og frá að þessi gervigreind sé að fara taka frá fólki sköpunargáfuna,“ segir Geir Ólafsson.