Ólöf Tara yrði hissa en þakk­lát að gangan sé til­einkuð henni

„Það kom eiginlega ekki annað til greina þar sem andlát hennar var sjokk fyrir allan málstaðinn. Hún var ein af helstu baráttukonum göngunnar og hefur gefið okkur svo ótrúlega margt. Bæði í Druslugöngunni og hjá öðrum, eins og Öfgum, þar sem hún var ein stofnenda. Við værum ekki á þessum stað án hennar og mér fannst ekkert annað koma til greina en að heiðra hana með þessum hætti,“ segir Silja Höllu Egilsdóttir, skipulagsteymi Druslugöngunnar.

Silja Höllu Egilsdóttir, skipulagsteymi Druslugöngunnar og drusla kom inn í skipulagsteymi Druslugöngunnar fyrir þremur árum en Margrét fyrir níu árum.

„Ég byrjaði sem áhugamanneskja um málstaðinn og svo er ég þolandi sjálf. Þetta fékk mjög persónulegan vinkil fyrir mig á þeim tíma, og svo hef ég ekki viljað hætta síðan,“ segir Silja.

Margrét Baldursdóttir, önnur skipuleggjenda, tekur undir að það sé erfitt að hætta.

„Ég var pöntuð sem táknmálstúlkur fyrir níu árum og ætlaði að standa á sviði sem hlutlaus táknmálstúlkur en um leið og ég fékk ræðurnar í hendurnar til að undirbúa mig sá ég að ég gat ekki gert annað en að standa þar sem þolandi, sem kann táknmál, og kom þá út úr skápnum sem þolandi nauðgunar. Og nú er ég að fara að standa á sviði níunda árið í röð, það annað sem skipuleggjandi, en þetta verður síðasta árið,“ segir hún og að nú ætli hún að setjast í helgan stein.

„En ég er alltaf þolandi, og verð alltaf drusla“.

Stofna nýjan minningarsjóð

Skipuleggjendur eru í nánu samstarfi við aðstandendur Ólafar Töru sem hafa nú stofnað minningarsjóð sem á að styðja við bæði þolendur og þau sem eru í framlínu baráttunnar, eins og Ólöf Tara var. Allur ágóði í tengslum við sölu á varningi mun renna í þennan sjóð. Yfirlýsinguna má sjá að neðan.

Gengið verður eins og áður frá Hallgrímskirkju og niður að Austurvelli. Þar verða tónleikar að lokinni göngu þar sem koma fram Gugusar, The Boob Sweat Gang, Torfi og Páll Óskar sem frumflytur nýtt lag við það tilefni.

Tveir hliðarviðburðir verða haldnir í tengslum við gönguna. Sá fyrri er pöbbkviss á þriðjudegi og sá seinni peppkvöld á fimmtudegi fyrir göngu.

„Það er til að koma öllum saman, það verður skiltagerð, föndur, tónlistaratriði, allt tl að ýta undir valdeflinguna og samstöðuna sem gangan snýst um.“

Útlendingaandúð og bakslag

Margrét segir að þó svo að baráttunni hafi orðið eitthvað ágengt upplifi hún bakslag í dag, það tengis til dæmis útlendingaandúð.

„Þetta byrjar á útlendingaandúð sem færist yfir á aðra hópa. Mér þykir það óskaplega sárt að sjá þjóðernishóp taka málstað okkar þolenda og klæða rasisma í búning þolendastuðnings. Það hefur orðið mikið bakslag og bakslag í samfélaginu í feminískri vitund.“

Silja tekur undir það og telur að betur þurfi að ná til yngri kynslóða . Í ár sé markmiðið að fara aftur í kjarna baráttunnar.

„Þetta er í þrettánda sinn sem við göngum og hún hefur tekið allskyns form og mót í gegnum árin. En í ár viljum við, sérstaklega í kjölfar andláts Ólafar Töru, heiðra alla þolendur. Þetta á að vera staður þar sem allir þolendur geta komið saman, skilað skömminni sem fylgir því miður öllum sem verða fyrir ofbeldi á einn eða annan hátt, og sérstaklega heiðra alla þá sem hafa týnt lífi sínu, af því að það lifa ekki allir þetta áfall af, því miður.“

Gellur eru bestar

Sérstakur hliðaviðburður verður eftir gönguna sem skipulagður er af Vitund, samtökum sem Ólöf Tara stofnaði stuttu fyrir andlát sitt með fjórum öðrum konum.

„Okkur „systrum“ Ólafar Töru í Vitund fannst viðeigandi, fyrst gangan er tileinkuð henni í ár, að hafa stað þar sem fólk getur komið saman eftir gönguna, hist, spjallað saman, faðmast og drukkið góðan bjór,“ segir Guðný S. Bjarnadóttir, ein stofnenda Vitundar og vinkona Ólafar Töru.

Á viðburðinum verður minning Ólafar Töru heiðruð með sérstökum bjór.

„Við ætlum að hafa bjór á barnum sem heitir Gellur eru bestar. Þetta er slagorð sem Ólöf sagði ofboðslega oft í tengslum við kvennasamstöðuna í baráttunni og okkur fannst ofboðslega viðeigandi að hafa það með.“

Guðný telur líklegt að Ólöf Tara hefði orðið afar hissa að vita að gangan væri tileinkuð henni.

„Eins hávær og fyrirferðarmikil og hún var þá var hún líka ofboðslega hógvær. Ég held hún yrði hissa, en gríðarlega þakklát.“

Guðný segir það sorglega staðreynd að konur láti lífið vegna ofbeldis.

„Kynbundið ofbeldi er faraldur á Íslandi sem þarf að uppræta. Ég myndi vilja sjá fleiri taka þátt í þessari upprætingu og sérstaklega fleiri karlmenn taka þátt.“

Hún segir andlát Ólafar Töru bæði persónulegan missi en einnig mikinn missi fyrir kvennabaráttuna. Þó svo að Vitund hafi tekið sér smá pásu þá séu þær nú að vinna að úrræði og verkferlum til hagsmuna brotaþola.

Árið í ár er kvennaár í tilefni af því að 50 ár eru frá því að kvennafrí var fyrst haldið Íslandi þann 24. október.

„Það er ótrúlega mikilvægt að stjórnvöld bregðist við kröfum kvennaársins. Við erum að tala um bæði jafnréttis- og ofbeldismál. Við erum byrjaðar að sjá breytingar en það er af nógu að taka. Við þurfum að sjá fastar stigið til jarðar.“

Óásættanlegt að gengið sé með sömu kröfur árlega

Það sé enn þannig að aðeins þrjú prósent nauðgunarmála endi með sakfellingu.

„Það er óásættanlegt, og sérstaklega þegar við horfum á það ár eftir ár að þolendur þurfa að bera þessa bagga og láta lífið af völdum ofbeldis. Við sjáum svo skýrt afleiðingarnar og við þurfum vitundarvakningu um þetta.“

Eins og fram kom að ofan er gengið í þrettánda sinn í ár. Guðný segir í raun óásættanlegt að það sé verið að ganga ár eftir ár með sömu kröfurnar.

„Við erum enn að berjast við það í dag að þolendum er ekki trúað, réttarkerfið tekur ekki rétt á málunum og við sjáum ekki að það séu afleiðingar af því að beita konur ofbeldi.“