„Fjöl­mennasti leikur sem Breiða­blik hefur spilað“

Klárir í slaginn og kunna ekki að halda leikjum lokuðum

„Þetta leggst bara mjög vel í mig. Mjög spenntur fyrir því að takast á við þetta verkefni. Risastórt evrópskt atvinnumannalið, pólskir meistarar og virkilega gott lið, en við erum klárir og hungraðir í góða frammistöðu“ sagði Halldór í símtali við Vísi í morgun.

Þið byrjið úti í Póllandi á þeirra heimavelli, má búast við því að þið reynið að halda leiknum frekar lokuðum í kvöld og reynið að opna hann frekar heima hjá ykkur á Kópavogsvelli í næstu viku?

„Við kunnum það ekkert, að halda leikjum lokuðum. Við þurfum bara að vera trúir okkur og halda í okkar gildi. Við leggjum bara upp með okkar aggressívu pressu og erum mjög sterkir varnarlega. Þannig að ef leikurinn er lokaður að því leitinu til, við fáum ekki mörg færi á okkur, þá er það jákvætt. En við ætlum bara að vera trúir okkar gildum“ sagði Halldór einnig.

Erfitt að lesa í andstæðinginn

Blikarnir ætla greinilega að mæta óhræddir, pressa stíft og sjá hvernig pólski andstæðingurinn bregst við en Halldór átti erfitt með að lesa í hvernig þeir munu leysa pressuna.

„Það verður bara að koma í ljós. Þeir hafa verið að spila aðeins öðruvísi núna fyrstu leiki þessa tímabils. Urðu meistarar í fyrra en eru aðeins að prófa sig áfram með marga nýja leikmenn.

Við spilum auðvitað maður á mann þannig að okkar pressa fylgir bara þeirra uppstillingu. Við verðum klárir með plan A og B, svo kemur bara í ljós hvernig þeir stilla þessu upp.“

Uppalinn Bliki spilar með Lech Poznan

Hjá Lech Poznan er uppalinn Bliki, Gísli Gottskálk Þórðarson, sem er búinn að jafna sig af axlarmeiðslum og gæti spilað í kvöld.

„Frábært að sjá Gísla, enn einn uppalinn Blika, fara og spila í flottum atvinnumannaklúbbi í Evrópu. Við erum bara stoltir af honum og samgleðjumst honum að vera kominn á þennan stað á sínum ferli. Það væri sannarlega fínt krydd ef hann spilar leikinn, ekki spurning.“

Meiðsli og stutt milli leikja 

Eitthvað er um meiðsli í leikmannahópi Breiðabliks og sömuleiðis mjög stutt milli leikja þessa dagana þannig að menn hafa ekki mikinn tíma til að jafna sig.

„Davíð Ingvarsson og Andri Yeoman eru ennþá frá. Aron Bjarnason er ennþá að glíma við sín vandamál en er til taks.

Aðrir eru í toppstandi en auðvitað bara tveir dagar síðan við spiluðum deildarleik. Við erum búnir að endurheimta vel og gera menn klára, flestir bara á mjög góðum stað.“

Fjölmennasti leikur í sögu félagsins

Leikurinn í kvöld verður væntanlega sá fjölmennasti í sögu Breiðabliks. Blikarnir hafa spilað fyrir framan tuttugu þúsund manns á Parken í Kaupmannahöfn en von er á fleira fólki í kvöld.

„Þeir eiga von á rúmlega tuttugu þúsund, jafnvel hátt í þrjátíu þúsund manns. Ef það fer yfir tuttugu þúsund verður það fjölmennasti leikur sem Breiðablik hefur spilað. Það verður spennandi, 43 þúsund manna leikvangur, alveg meiriháttar og gerir þetta ennþá skemmtilegra…

...Þetta er aðeins öðruvísi en í síðustu umferð. Þó það hafi verið hörkuandstæðingur og fínar aðstæður, þá er þetta á allt öðrum skala. Þetta er bara í hæsta flokki í Evrópu, algjörlega sturlaður leikvangur…

Skemmtilegt en samt á þann hátt að við erum ekki bara að mæta þeim til að vera með. Við ætlum að eiga okkar bestu frammistöðu og sjá hverju það skilar“ sagði Halldór að lokum.

Leikur Lech Poznan og Breiðabliks hefst klukkan hálf sjö í kvöld og verður í beinni útsendingu á Sýn Sport.