Þurfa að breyta leiðinni í Tour de France vegna smitfaraldurs

Breyta þurfti leiðinni sem verður farin á morgun föstudag, hálfum sólarhring fyrir að kapparnir áttu að fara af stað.

Ástæðan er líka óvenjuleg því þetta kemur til vegna smitfaraldurs í búfé á svæðinu sem átti að hjóla í gegnum. NRK segir frá.

Smitsjúkdómur gekk á milli nautgripa í Col des Saisies og það þurfti að lóga öllum kúnum.

Þetta er mikið áfall fyrir bændur á svæðinu og til að sjá til þess að þeir fái að vera í friði frá skarkalanum í kringum Frakklandshjólreiðarnar var ákveðið að breyta leiðinni.

Dagleiðin byrjar eftir sem áður í Albertville en fljótlega beygja hjólreiðakapparnir út af fyrir fram ákveðinni leið.

Þetta mun einnig spara þeim tvær vænar brekkur og leiðin styttist úr 129,9 kílómetrum í 95 kílómetra. Hjólreiðakapparnir fara líka klukkutíma seinna af stað. 

Slóveninn Tadej Pogacar er í forystu en hann er með fjögurra mínútna og 26 sekúndna forskot á næsta mann sem er Daninn Jonas Vingegaard. Það eru síðan rúmar ellefu mínútur í Þjóðverjann Florian Lipowitz í þriðja sætinu.