Jóhannes skrifar undir hjá Kolding

Bjarni Guðjónsson, faðir Jóhannesar, birti mynd af syninum við undirskrift á samningi á Facebook-síðu sinni í dag. Jóhannes fer frá KR til Kolding en samningur hans við Vesturbæjarliðið var við það að renna út í haust.

Tipsbladet greinir frá því að Kolding borgi KR um tíu milljónir króna fyrir Jóhannes. Jóhannes er 20 ára gamall og reynir fyrir sér í atvinnumennsku öðru sinni.

Hann var samningsbundinn Norrköping í Svíþjóð frá 2021 til 2023 og tókst að spila einn leik fyrir aðallið félagsins þrátt fyrir ungan aldur. 2023 kom hann heim í KR, hvar hann er uppalinn, og hefur verið þar til nú.

Síðasti leikur Jóhannesar fyrir KR var 1-1 jafntefli við Breiðablik um helgina. Hann skoraði sex mörk í 15 leikjum fyrir liðið í sumar. KR situr í 11. sæti Bestu deildarinnar með 17 stig, einu frá öruggu sæti.

Fótbolti.net greinir frá því að KR vilji fá Orra Hrafn Kjartansson, leikmann Vals, til að fylla í skarð Jóhannesar. Samningur Orra Hrafns við Val rennur út eftir tímabilið.

Kolding er í fimmta sæti í dönsku B-deildinni með þrjú stig eftir fyrstu tvo leiki tímabilsins sem var að hefjast í Danmörku.