Eig­andi Newcastle gæti hjálpað Liverpool að kaupa Isak

Liverpool þarf örugglega að eyða stórri peningaupphæð ætli félagið að sannfæra Newcastle um að selja sænska framherjann Alexander Isak.

Hluti af þessum peningum koma eflaust í gegnum sölu á úrúgvæska framherjanum Darwin Nunez. Liverpool er búið að selja Luis Diaz til Bayern München fyrir fína upphæð en ætlar væntanlega að selja Nunez líka fyrir væna upphæð.

Nú eru taldar mestar líkur á því að Liverpool fái mestan pening fyrir Nunez með því að selja hann til sádi-arabíska félagsins Al-Hilal.

Þar flækjast jafnframt aðeins málin eins og kemur fram í frétt hjá breska ríkisútvarpinu.

Al-Hilal er nefnilega 75 prósent í eigu fjárfestingarsjóðs sádi-arabíska ríkisins.

Sama sjóður á auðvitað enska úrvalsdeildarfélagið Newcastle. Sjóðurinn á reyndar stóran hluta í öllum stærstu fótboltafélögum Sádí Arabíu.

Newcastle er þegar búið að hafna 110 milljón punda tilboði í Isak og metur sænska framherjann á 150 milljónir punda.

Fari svo að Liverpool selji Nunez til Al-Hilal þá mun eigandi Newcastle hreinlega hjálpa Liverpool að kaupa Isak. Næstum því helmingur kaupverðsins gæti komið í gegnum þá sölu.

Stuðningsmenn Newcastle hafa tekið mjög illa í vesenið með Isak og ekki verða þeir sáttari við þessar fréttir. Isak hefur verið kallaður rotta og á varla endurkomu í félagið.

Það bjuggust líka flestir þeirra við því að sjá þessa ríku eigendur eyða meiri pening í leikmenn en félaginu hefur gengið illa að halda sig innan rekstrarreglna ensku úrvalsdeildarinnar. Það hefur ekki auðveldað félaginu að sækja öfluga leikmenn og er sögð meðal annars ástæðan fyrir því að Isak vill fara.

Hvað sem gerist þá verða næstu dagar fróðleikir hjá bæði Newcastle og Liverpool.