Öryggissérfræðingur hefur trú á boðuðum að­gerðum í Reynisfjöru

Banaslysið sem varð í Reynisfjöru um liðna helgi hefur hrundið af stað kraftmikilli umræðu um stöðu öryggismála á fjölförnum ferðamannastöðum á Íslandi. Dagbjartur Brynjarsson, er sérfræðingur á sviði öryggismála hjá Ferðamálastofu.

„Það er mjög mikilvægt í öllum tilfellum þegar slys verða að við horfum í tilfellið og við reynum að rýna það og draga fram lærdóm, bæði af því sem vel er gert en líka því sem betur má fara. Það er alltaf kjarninn í því sem við gerum. Þannig eiga gæða- og öryggiskerfi að virka“

Náttúran breytist og viðmiðin þurfi að gera það líka

Landeigendur tilkynntu í gær að þeir hygðust herða öryggiskröfur, hættulegasta svæðinu í Reynisfjöru verður þannig lokað með hliði þegar aðstæður eru slæmar, svo eitthvað sé nefnt.

„Ég var sjálfur á þessum fundi og mér lýst bara mjög vel á þessar tillögur sem komnar eru fram og það þarf að hafa í huga að ströndin er náttúrulega síbreytileg og það þarf að taka margt inn í þessa mælingu um það hvenær og hvernig er öruggt að vera á svæðinu. Það er verið að uppfæra viðmiðin út frá því að nú hefur náttúran breyst, ströndin hefur minnkað og þar af leiðandi hafa þau viðmið sem voru sett á sínum tíma fyrir rautt ljós til dæmis - þau hafa breyst, og það þarf að uppfæra þau. Sömuleiðis að þegar það fer á rautt að loka þetta þá þannig af að það fari ekkert á milli mála hjá fólki hvort það sé að fara inn á svæði þar sem er meiri áhætta.“

Ég heyri að þú hefur trú á því að þetta muni betrumbæta öryggi töluvert á þessu svæði?

Já, ég hef trú á því. En það munu alltaf einhverjir fara fram hjá, ég held það sé alveg ljóst en lang lang langflestir munu fylgja þeim fyrirmælum. Það er það sem við sjáum þar sem virk stýring er á ferðamönnum, þar er ferðamaðurinn í langflestum tilfellum að fylgja þeim fyrirmælum.“

Ísland öruggt í alþjóðlegum samanburði

Hann segir að öll ferðaþjónustufyrirtæki vera meðvituð um mikilvægi öryggis.

„Við megum ekki gleyma því að hér kemur tæplega 2 og hálf milljón manns á hverju ári til þess að upplifa og Ísland er, ef við horfum á samanburðartölur við önnur lönd þá er Ísland öruggt.“