Taka sæti í fram­kvæmda­stjórn Arctic Adventures

Í tilkynningu segir að Gunnar Hafsteinsson hafi verið ráðinn framkvæmdastjóri upplýsingatæknisviðs. 

Hann hefur víðtæka reynslu úr upplýsingatækni og stafrænni vöruþróun en hann starfaði áður hjá Noona Iceland, Símanum, Five Degrees og Landsbankanum.

Gunnar er með MBA gráðu frá Háskólanum í Reykjavík og B.Sc. gráðu í tölvunarfræði frá sama skóla.

Lina Zygele, markaðsstjóri Arctic Adventures, tekur samhliða sæti í framkvæmdastjórn. Lina hóf störf hjá Arctic Adventures árið 2019 sem sérfræðingur stafrænni markaðssetningu. Hún er með B.Sc. gráðu í viðskiptafræði og M.Sc. gráðu í markaðsmálum og samskiptum frá Háskólanum í Vilnius í Litháen.

Haft er eftir Ásgeiri Baldurs, forstjóra Arctic Adventures, að hann sé afar ánægður með að fá Gunnar og Linu inn í framkvæmdastjórn félagsins þar sem þau muni spila stórt hlutverk. „Undanfarin misseri höfum við byggt upp og eflt enn frekar innviði Arctic Adventures, fjárfest í vöruþróun og aukið vöruframboð okkar. Fjárfesting í aukinni tæknigetu og stafrænni markaðssetningu er lykillinn að áframhaldandi vexti Arctic Adventures sem leiðandi ferðaþjónustufyrirtækis á Íslandi.”