Ný við­bygging við Þjóð­leik­húsið „lang­þráður draumur“

Logi Einarsson menningar,- nýsköpunar- og háskólaráðherra, tilkynnti um þetta viðsetningu Menningarnætur í hádeginu í dag.

„Það er mikið fagnaðarefni að ríkisstjórnin skuli vera einhuga um þessa skynsamlegu og löngu tímabæru fjárfestingu. Með þessari ákvörðun er Þjóðleikhúsinu gefinn kostur á að vaxa og dafna, auka sértekjur sínar og gera reksturinn hagkvæmari. Þetta er viðeigandi gjöf til þjóðarinnar á þessu tímamótaári lykilstofnunar í íslensku menningarlífi,“ segir Logi Einarsson menningar,- nýsköpunar- og háskólaráðherra, í tilkynningu um málið á vef stjórnarráðsins.

Þar kemur fram að frá opnun Þjóðleikhússins árið 1950 hafi íbúafjöldi höfuðborgarsvæðisins þrefaldast en á sama tíma hafi aðstaða leikhússins lítið breyst. Í um fjörutíu ár hafi verið kallað eftir nýrri viðbyggingu á nærliggjandi lóð sem geti hýst annað leiksvið, svokallaðan „svartan kassa,” sem er sveigjanlegra en hefðbundið leiksvið.

Þjóðleikhússtjóri að springa

Magnús Geir Þórðarson þjóðleikhússtjóri segir það stórkostlega fréttir að byggja eigi viðbyggingu við Þjóðleikhúsið. Það sé stærsta framfaraskref í sögu leikhússins í 75 ára sögu þess. Nýtt leiksvið bjóði upp á mörg tækifæri.

„Við teljum að þetta muni auka tækifæri okkar til að sækja fram, vaxa og dafna, og auðvitað taka á móti fleiri gestum af því að aðsóknin hefur verið gríðarlega mikið.“

Húsið verður reist á Lindargötu, bakvið Þjóðleikhúsið, við hliðina á Kassanum. Vinna hefst þegar í stað við þróun og hönnun og stefnt verður að því að opna og hefja sýningar á nýju sviði fyrir 80 ára afmæli leikhússins eftir fimm ár.

„Þjóðeikhúsið er höfuðstofnun í sviðslistaumhverfinu og hefur mikil áhrif á leikhúslífið allt, þannig þetta er fagnaðarefni fyrir leikhúslífið í landinu.“

Magnús segist vera að „springa úr spenningi“ yfir þessum áfanga. Það hafi verið unnið að þessu í mörg ár.

Gert er ráð fyrir að umrædd bygging geti tekið á móti um 250-320 áhorfendum á hverja sýningu með tilheyrandi tekjum fyrir Þjóðleikhúsið. Skortur á slíku rými hefur verið fyrirferðarmikill flöskuháls í starfsemi Þjóðleikhússins sem hefur ekki getað nýtt til fulls innviði sína án slíkrar aðstöðu.

Kosti um tvo milljarða

Þá segir í tilkynningu að með nýrri viðbyggingu verði leikhúsinu einnig tryggð æfingaaðstaða sem hafi verið skortur á. Viðbyggingin muni þannig hýsa æfingaaðstöðu sem og verðmætt búninga- og leikmunasafni leikhússins sem liggi undir skemmdum í núverandi húsnæði.

Frumgreining, sem ráðuneytið lét gera, gerir ráð fyrir að fjárfestingin muni nema um tveimur milljörðum króna og að byggingin verði um 2-3000 fermetrar að stærð. Næstu skref eru samkvæmt tilkynningu að fela Framkvæmdasýslunni - Ríkiseignir verkefnið og óska formlega eftir að hafin verði undirbúningsvinna og áætlanagerð á vegum stofnunarinnar. Að þeirri vinnu lokinni taka við verklegar framkvæmdir með það að markmiði að viðbyggingin verði tekin í notkun árið 2030, á 80 ára afmæli Þjóðleikhússins.