Mann­skæð skot­á­rás í skóla í Banda­ríkjunum

Brian O‘Hara, lögreglustjóri Minneapolis, sagði á blaðamannafundi að árásin hafi verið framin í messu í kirkju við skólann. Hann sagði mann hafa skotið úr riffli inn um glugga kirkjunnar á börn og aðra kirkjugesti sem sátu þar inni.

Hann var einnig vopnaður haglabyssu og skammbyssu, samkvæmt lögreglustjóranum, og hleypti af öllum þeirra. Þá hafði hann sett tálma á að minnsta kosti eina hurð kirkjunnar áður en hann hóf skothríðina og er hann sagður hafa hleypt af tugum skota.

Tvö börn eru látin. Annað þeirra var átta ára gamalt og hitt tíu ára. Sautján eru særðir, þar af fjórtán börn og tvö þeirra eru í alvarlegu ásigkomulagi.

„Heigullinn sem hleypti þessum skotum af, svipti sig svo lífi fyrir aftan kirkjuna,“ sagði O‘Hara.

Árásarmaðurinn var á þrítugsaldri og var ekki kunnugur lögreglu, samkvæmt lögreglustjóranum. Verið er að kanna hvert tilefni ódæðisins var og er talið að hann hafi verið einn að verki.

Fjórða skotárásin á einum degi

Þetta er að minnsta kosti fjórða mannskæða skotárásin í borginni á einum sólarhring. Einn lét lífið og sex særðust í árás fyrir utan annan skóla í gær og tveir aðrir létu svo lífið í tveimur mismunandi árásum seinna í gær.

Árásin átti sér stað við kirkju á skólalóðinni, þar sem börn höfðu komið saman í messu í upphafi skóladags.

Faðir eins skólabarns sem býr nærri skólanum og sagðist þekka til skotvopna sagði skothríðina hafa hljómað eins og árásarmaðurinn hafi notað hálf sjálfvirkan riffil. Skothríðin hafi staðið yfir í nokkrar mínútur og telur faðirinn sig hafa heyrt þrjátíu til fimmtíu skot.

Fréttin hefur verið uppfærð.