„Keppni sem allir golfáhugamenn elska“

Ákveðið mörg sæti í hvoru liði eru tekin frá fyrir leikmenn sem efstir eru á stigalistum en þjálfarar liðanna geta síðan valið sex leikmenn hvor til að fylla öll pláss í hópnum. Fyrirkomulagið er holukeppni. Í dag eru fjórar viðureignir í fjórmenningi og fjórar í betri bolta. Það endurtekur sig síðan á laugardeginum. En á lokadeginum eru tólf viðureignir í tvímenningi.

„Þetta mót er bara veisla fyrir alla golfáhugamenn og þetta er sú keppni sem allir golfáhugamenn elska að horfa á og hlakka til á tveggja ára fresti,“ segir Ingi Rúnar Gíslason golflýsandi Sýnar.

„Það sem ég er spenntastur að sjá er hvernig bandaríska liðið á eftir að koma undirbúið til leiks. Evrópa hefur verið meira lið í gegnum tíðina heldur en það bandaríska.“

Luke Donald, fyrirliði evrópska liðsins, skaut á bandaríska liðið á opnunarhátíð Ryder-bikarsins í vikunni. Talsvert hefur verið rætt um launin sem Bandaríkjamenn fá fyrir að keppa í Ryder-bikarnum.

„Þetta eru í raun bara svona mindgames og Evrópumennirnir eru stoltir af því að taka engar greiðslur fyrir þetta, þó þeir fái samt sem áður einhverjar greiðslur. Þeir segjast vera spila fyrir stoltið.“

Ingi segir að Bethpage völlurinn í Farmingdale sé einfaldlega stórkostlegur.

„Þetta er einn af erfiðari völlum Bandaríkjanna. Hann er að vísu gerður frekar léttur fyrir þessa keppni því við viljum sjá þessa kylfinga vera taka meiri sénsa. Við eigum eftir að sjá völlinn mun styttri og með minni karga heldur en þekkist.“