Stór­tap Air Greenland vegna aflýstra flug­ferða til Nuuk

Í fréttum Sýnar var fjallað um þær breytingar sem orðið hafa í flugvallarmálum Grænlands. Það var í lok nóvember í fyrra sem breiðþota Air Greenland kvaddi Kangerlussuaq-flugvöll þegar hún hélt þaðan í síðasta reglubundna áætlunarflugið til Danmerkur. Í næsta flugi frá Kaupmannahöfn varð hún fyrsta flugvélin til að lenda á nýju flugbrautinni í Nuuk en þúsundir Grænlendinga mættu þá til að fagna tímamótunum.

„Það sem átti að vera svo rosalega jákvætt, þegar við lentum hérna 28. nóvember... - það voru tíu þúsund manns sem stóðu hérna og tóku á móti vélinni, stóru þotunni okkar,“ segir Inga Dóra Guðmundsdóttir, framkvæmdastjóri samskipta- og sjálfbærnimála Air Greenland, í viðtali á Nuuk-flugvelli.

Þess í stað hafa menn upplifað vonbrigði sökum þess hversu miklu oftar hefur þurft að aflýsa flugi til Nuuk miðað við Kangerlussuaq.

„Við vissum að það myndi gerast. En það hefur bara verið ótrúlega mikið út af veðri, af aflýsingum, sem við bara aldrei höfum upplifað áður í sögu okkar, sem eru sextíuogfimm ár núna bráðum.“

Á fyrstu sex mánuðum þessa árs voru 59 aflýsingar í Nuuk miðað við aðeins þrjár á sama tíma í fyrra þegar Kangerlussuaq var flugmiðstöðin.

„Þegar kemur að veðráttunni þá er rosalega lítið hægt að gera - annað en bara sætta sig við það,“ segir Inga Dóra í viðtali sem sjá má hér:

En fleira hefur plagað Nuuk, eins og vandræði með hálku á brautinni og tafir í vopnaleit og afhendingu farangurs.

Þá hefur það ítrekað gerst að þurft hefur að snúa flugvélinni við, jafnvel þegar hún er komin langleiðina til Nuuk.

„Við höfum þurft að fara til baka til Kaupmannahafnar, millilendum í Keflavík til þess að fá eldsneyti og höldum svo til baka til Kaupmannahafnar. Það hefur náttúrlega valdið mikilli gremju, fólk er bara þreytt á þessu, að fara í svona langa ferð upp á kannski þrettán klukkutíma í flug með viðkomu í Keflavík,“ segir Inga Dóra.

Þar sem Nuuk er safnflugvöllur fyrir allt Grænland hafa aflýsingar víðtæk áhrif á farþega frá öðrum byggðum, sem komast ekki strax áfram í framhaldsflug og neyðast til að gista í Nuuk. Þeir þurfa bæði fæði og húsnæði og stundum í fleiri en einn dag.

„Og hver á að borga þann reikning? Það lendir oft á okkur, bitnar á okkur.“

Ofaná bætist skortur á gistirými og segir Inga Dóra Air Greenland ítrekað hafa þurft að láta farþega gista í flugstöðinni. Þá hafi þurft að útvega sal og láta farþega fá lítið rúm, teppi og kodda.

Fyrir starfsfólk Air Greenland hafa undanfarnir mánuðir verið einstaklega erfiðir og krefjandi, ekki síst fyrir Ingu Dóru sem samskiptastjóra flugfélagsins.

„Þetta er ekkert smá rosalegt álag. Og ég hef oft staðið bara í flugstöðinni til þess að reyna að hjálpa til með að útskýra hvernig ástandið er og út af hverju við erum í svona ástandi.“

Rekstrartap Air Greenland fjórfaldaðist á fyrri helmingi þessa árs miðað við árið á undan, fór úr um 400 milljónum íslenskra króna upp í um 1.700 milljónir króna, jókst um 1.300 milljónir íslenskra króna.

„Þetta er rosalegur kostnaður sem hefur fylgt okkur núna bara í ár,“ segir Inga Dóra.

Hér má sjá þotuna lenda á nýja flugvellinum í fyrsta sinn þann 28. nóvember í fyrra: