„Þeir skutu úr ein­hverjum fjöru­tíu vítum“

„Það er gott að byrja þetta á sigri. Það er mikilvægt að byrja mótið vel og ég er ánægður með sigurinn,“ sagði Arnar strax að leik loknum.

Spurður að því hvað svona sigur gefi liðinu aukalega segir Arnar það vissulega gefa trú á verkefnið en á sama tíma þá þurfi liðið að halda áfram að bæta sig burt séð frá sigrinum í kvöld.

„Það gefur okkur trú að við getum unnið leiki þegar þeir eru jafnir og að við getum haldið áfram að sýna góða frammistöðu, það er ákveðinn lærdómur í því. Svo er það nú bara þannig að við þurfum að vakna á morgun og halda áfram að verða betri alveg sama hvort við höfum hitt hérna í lokin eða ekki.“

Tindastóll náði frábærum kafla í fyrri hálfleik sem gaf liðinu mest 17 stiga forystu en heimamenn í Val tókst að jafna leikinn hægt og bítandi en Tindastóll hafði rúmlega sex sekúndur til að skora þessa sigurkörfu hér undir lok leiksins. Hvað er það sem gerist hér í seinni hálfleik?

„Þeir læstu okkur svolítið varnarlega og á sama tíma náðum við ekki að hreyfa boltann nógu vel. Undir lokinn eru þeir eiginlega aðeins á vítalínunni og við það verður leikurinn rosalega hægur og við náum ekki að skora í bakið á þeim ásamt því að þeir fengu rosalega mikið af sóknarfráköstum á þessum tíma. Það að við séum að spila við lið sem er annálað fyrir að leika góðan varnarleik, tekst ekki að ná nógu mörgum fráköstum og svo að þeir voru að skjóta úr einhverjum 40 vítum eða eitthvað gerði þetta aðeins erfiðar fyrir okkur í seinni hálfleik.“

Eftir að hafa látið fara hægt um sig var Dedrick Basile stórkostlegur í fjórða leikhlutanum og gerði 15 stig. Hvernig metur þú frammistöðu hans hér undir lokin?

„Hann gerði vel. Við náðum að opna vel fyrir hann með einhverjum hlutum hér undir lokin. Hann gerði svo sitt enda þurftum við á honum að halda hér í kvöld.“