Undir­býr kveðju­stund í Straums­vík

„Ég er afar þakklát fyrir að fá að velja sjálf að hætta hjá fyrirtækinu á þeim tímapunkti sem mér þykir réttur – bæði fyrir mig persónulega og fyrir fyrirtækið,“ segir Rannveig í persónulegum pósti.

Þar rifjar hún upp þegar hún sótti 28 ára gömul um starf hjá ISAL í Straumsvík sem þá var í eigu svissneska fyrirtækisins Alusuisse. Árið var 1990.

Ár í órafjarlægð

„Á þeim tíma þurfti að senda út formlega tilkynningu til móðurfélagsins um ráðningar í stöður yfirmanna hjá ISAL. Allt sem ég las yfir var kunnuglegt og kom heim og saman, nema fjórir tölustafir í hægra horninu. 2 0 2 6.“

Hún hafi spurt út í tölurnar og henni tjáð að þetta væri árið sem hún færi á eftirlaun.

„Og nú er að koma að þessu ári sem virtist í svo mikilli órafjarlægð árið 1990 að ég tengdi ekki þessa fjóra tölustafi einu sinni við ártal á komandi öld. Þann 9. maí 2026 fagna ég 65 ára afmæli mínu. Á þeim degi mun ég einnig hætta störfum sem forstjóri ISAL, þá á mínu þrítugasta ári sem forstjóri.“

Hún segir fyrirtækið standa vel.

„Þeir mælikvarðar sem við höfum bein áhrif á með störfum okkar í Straumsvík standa sterkt og sumir hverjir með hæsta móti innan móðurfélagsins, Rio Tinto. Ég er afar stolt af þeim árangri sem starfsfólkið í Straumsvík nær með störfum sínum og þeirri menningu sem þar hefur byggst upp síðustu áratugi. Starfsánægja mælist mjög há, varan sem framleidd er þar er í hæsta gæðaflokki, við stöndum okkur vel í því sem varðar öryggi, heilbrigði og umhverfismál og leitum stöðugt nýrra leiða til umbóta og framþróunar. Starfsfólkið í Straumsvík er á heimsmælikvarða.“

Hlakkar enn til að mæta í vinnuna

Hún hafi alla tíð notið sín í Straumsvík og haft einstaklega gaman af vinnunni.

„Þar hef ég fengið tækifæri til að takast á við bæði skemmtileg og krefjandi verkefni í áranna rás í gefandi samstarfi við yndislega vinnufélaga. Mér finnst verkefnin enn þann dag í dag spennandi og hlakka hvern dag til þess að mæta til vinnu.“

Næsta vor taki við spennandi tímar sem hún muni njóta í faðmi fjölskyldu og vina og einnig fá tækifæri til að takast á við annars konar verkefni tengd mínum áhugamálum og reynslu.