Fær taugaveiklaðan hund endur­greiddan

Þetta var niðurstaða Kærunefndar vöru- og þjónustukaupa, sem kvað upp úrskurð þann 8. október síðastliðinn. Í úrskurðinum segir að kona hafi keypt hvolp af ótilgreindri tegund af ræktendunum og greitt fyrir hann 380 þúsund króna. Kaupsamningur hafi verið undirritaður í lok október árið 2023 og hvolpurinn afhentur sama dag.

Árásarhneigður og gelti mikið

Í kvörtun sinni til nefndarinnar hafi konan greint frá því að hún hafi leitað til ræktendanna eftir að hafa misst hund af sömu tegund og óskað eftir að eignast nýjan hvolp. Þar sem ræktendurnir hafi ekki átt von á goti hafi þeir í staðinn boðið konunni rúmlega eins árs gamlan hund, sem þeir hafi sagt vera húsvanan. 

„Fljótlega eftir afhendingu hafi þó komið í ljós að hundurinn var ekki húsvanur og sýndi strax merki um mikla taugaveiklun. Sóknaraðili, sem kveðst vera vanur hundaeigandi, hafi veitt hundinum næga útivist, athygli og umhyggju, en hundurinn hafi engu að síður sýnt árásarhegðun, verið mjög taugaveiklaður og gelt mikið.“

Vildi skila hundinum viku eftir afhendingu

Í niðurstöðukafla úrskurðarins segir að um viku eftir afhendingu hvolpsins hafi konan haft samband við ræktendurna og greint frá því að fjölskyldan ætti í vandræðum með hundinn þar sem hann reyndist ekki húsvanur þrátt fyrir aldur. Í sama samtali hafi hún sagt að hún vildi skila hundinum aftur. 

Konan hafi ítrekað haft samband í kjölfarið en ræktendurnir hafi sagst ekki kannast við þessa hegðun hundsins og vísað konunni til tiltekins hundaþjálfara. 

„Í byrjun desember 2023 hafði sóknaraðili á ný samband við varnaraðila. Hún upplýsti þá að vandamálin hefðu haldið áfram, meðal annars að hundurinn hefði bitið eiginmann hennar og ítrekað ráðist á annan hund á heimilinu. Sóknaraðili ítrekaði ósk sína um að varnaraðili tæki hundinn til baka þar sem hún teldi hann taugaveiklaðan og ekki líða vel.“ 

Um miðjan desember sama ár hafi konan sagt ræktendunum frá niðurstöðu hundaþjálfara, sem hafi talið litla von um að hundurinn gæti aðlagast. Konan hafi lýst því að hundurinn væri hræddur, sýndi árásarhegðun og hefði neikvæð áhrif á heimilislífið. Hún hafi hundinum fyrir bestu að vera ekki áfram á heimilinu og óskað eftir að fá að skila honum og fá í staðinn hvolp úr næsta goti eða endurgreiðslu kaupverðs. 

Konan hafi ítrekað beiðni sína í þrígang þangar til að ræktendurnir hafi tilkynnt henni að hvolpurinn yrði sóttur um miðjan febrúar árið 2024.

Sögðust ekki eiga hvolpa en auglýstu slíka til sölu

Í kjölfarið hafi ræktendurnir tilkynnt konunni um að ekkert got væri fyrirsjáanlegt og því væri ekki unnt að afhenda nýjan hvolp. Konan hafi lagt fram skjáskot sem sýnir auglýsingu á hvolpi úr goti ræktendanna í lok mars 2024. Ræktendurni hafi þó ekki fallist á afhendingu nýs hvolps eða endurgreiðslu á kaupverði hundsins. 

Í úrskurðinum segir að ræktendurnir hafi ekki komið að andsvörum eða mótmælt fullyrðingum konunnar og því yrði byggt á þeim í málinu.  

Með vísan til málsatvika hafi kærunefndin talið að hundurinn hafi hvorki svarað til þeirra upplýsinga sem ræktendurnir gáfu við kaupin né haft þá eiginleika sem konan mátti vænta miðað við aldur dýrsins og fullyrðinga ræktenda. 

Þá liggi fyrir að ræktendurnir hafi tekið við hundinum þann 14. febrúar 2024 eftir ítrekaðar kvartanir konunnar og skýra kröfu um að fá að skila hundinum. Með þeirri athöfn telji kærunefndin að ræktendurnir hafi viðurkennt skil á hundinum og riftun kaupanna. 

Vísuðu til ákvæðis sem var ekki heimilt að semja um

Ræktendurnir hafi ekki endurgreitt konunni kaupverð hundsins og þess í stað vísað til ákvæðis í kaupsamningi sem heimili seljanda að taka við hundi án endurgreiðslu vegna óviðráðanlegra aðstæðna kaupanda. 

„Kærunefndin bendir á að ástæða þess að hundinum var skilað voru ekki persónulegar aðstæður sóknaraðila heldur vegna vandamála tengdum hundinum. Þá bendir kærunefndin á að ekki er heimilt að semja um eða bera fyrir sig kjör sem eru neytanda óhagstæðari en leiðir af lögum um neytendakaup.“

Með vísan til þess og viðtöku ræktendanna á hundinum og þess að ræktendurni hafi ekki orðið við kröfu konunna um nýja afhendingu þá líti kærunefndin svo á að ræktendunum beri skylda til að endurgreiða konunni kaupverð hundsins, 380.000 krónur.