Rory McIlroy vill verða fyrir­liði Ryder-liðs Evrópu

McIlroy keppir á sínu fyrsta móti á Indlandi í þessari viku en hann snýr aftur til keppni eftir að hafa hjálpað Evrópu að halda Ryder-bikarnum með sigri á Bandaríkjunum í New York í síðasta mánuði.

Hinn 36 ára gamli Norður-Íri hefur keppt í síðustu átta Ryder-bikarkeppnum og sem annar efsti maður heimslistans og núverandi Masters-meistari gerir hann ráð fyrir að vera í liðinu í nokkur skipti í viðbót – ekki síst á Írlandi árið 2027.

En hann sagði á miðvikudag að hann vildi leiða liðið einhvern tímann í framtíðinni sem fyrirliði frekar en sem stjörnuleikmaður þess.

„Algjörlega, ég myndi elska að verða fyrirliði einn daginn og ég tel mig mjög lánsaman að hafa fengið að fylgjast með nokkrum af bestu fyrirliðum sögunnar í Ryder-bikarnum úr fremstu röð,“ sagði McIlroy og nefndi Paul McGinley – sigurvegarann frá 2014 – og Luke Donald, sem leiddi Evrópu í síðustu tveimur keppnum.

„En,“ bætti hann við, „vonandi ekki fyrr en um miðjan fjórða áratuginn, ef ég get haldið áfram að spila vel.“

McIlroy varð fyrir miklu áreiti frá bandarískum áhorfendum á Bethpage Black og svaraði stundum í sömu mynt í æstu andrúmslofti sem varð að lokum aukaatriði vikunnar.

„Bara síðustu tvær vikur, að geta horft á hápunktana og bara séð, sérstaklega þessa fyrstu tvo daga, í fjórleik og fjórmenningi hversu gott evrópska liðið var,“ sagði McIlroy. „Bandaríkjamennirnir slógu nálægt; við slógum nær. Bandaríkjamennirnir setja niður pútt og við setjum niður pútt ofan á það, og það gerðist í hvert einasta skipti.“

„Það leiðinlega er að fólk man ekki eftir því og man eftir vikunni af röngum ástæðum. Ég myndi vilja breyta umræðunni og einbeita mér að því hversu gott evrópska liðið var og hversu stoltur ég var af því að vera hluti af því liði sem vann Ryder-bikar á útivelli,“ sagði McIlroy.