Úlfarnir ráku Pereira

Pereira fékk nýjan þjálfarasamning í september sem var í gildi til sumarsins 2028 en á þeim tímapunkti voru Úlfarnir án stiga eftir fjóra leiki. Síðan þá hefur árangurinn ekki batnað og liðið situr án sigurs í botnsæti deildarinnar með tvö stig eftir tíu leiki.

Wolves sló West Ham og Everton út úr enska deildabikarnum á þessu tímabili en datt út í sextán liða úrslitum á móti Chelsea á miðvikudaginn.

Pereira var ráðinn í desember á síðasta ári. Hann lyfti liðinu úr nítjánda sæti í það sextánda og forðaði því frá falli.

Wolves hefur verið í ensku úrvalsdeildinni síðan 2018 en það verður erfitt verkefni fyrir eftirmann Pereira að sjá til þess að það breytist ekki.

Fjórir knattspyrnustjórar hafa verið reknir í efstu deild Englands það sem af er tímabili. Tveir þeirra voru hjá Nottingham Forest (Nuno Espírito Santo og Ange Postecoglou), á meðan Graham Potter missti starfið hjá West Ham.