Engir sér­fræðingar að verki og sá yngsti um tví­tugt

Það var á föstudaginn síðastliðinn sem Landsbankinn uppgötvaði að háum upphæðum hafði verið stolið af bankanum. Reiknistofa bankanna hefur upplýst að við uppfærslu á kerfum stofnunarinnar hafi skapast tímabundinn veikleiki sem hafi orðið til þess að við tilteknar aðstæður millifærðu nokkrir einstaklingar fjármuni af eigin reikningum án þess að inneign væri til staðar.

Sá yngsti rétt yfir tvítugt

Mennirnir fimm sem voru handteknir eru á þrítugs- og fertugsaldri en yngsti sakborningurinn er rétt yfir tvítugt. Samkvæmt heimildum fréttastofu búa þeir ekki yfir sérfræðiþekkingu sem gerði þeim kleift að notfæra sér tímabundna veikleikann. Sakborningarnir eru búsettir hérlendis og eru ýmist íslenskir eða erlendir ríkisborgarar.

Í gær kom fram að mennirnir höfðu í heildina svikið út 400 milljónir frá íslenskum bönkum. Þar af voru tíu milljónir frá Arion banka en um 390 milljónir frá Landsbankanum. Bankinn gat strax fryst um 190 milljónir og takmarkað tjónið við 200 milljónir.

Eins og stendur er búið að frysta og leggja hald á muni og fjárhæðir sem nema samtals um 250 milljónum. Lagt hefur verið hald á fimm bíla sem eru samtals fjörutíu milljóna króna virði en þar á meðal eru glæsilegir sportbílar. Lögreglan vinnur enn að því að endurheimta fjármuni

Millifærðu endurtekið

Svo virðist sem fjársvikin hafi farið þannig fram að mennirnir millifærðu endurtekið á milli eigin reikninga innan takmarkaðs tímaglugga yfir nokkurra daga skeið á meðan uppfærsla á kerfum Reiknisstofu bankanna stóð yfir. Villan virðist hafa valdið því að mönnunum var kleift að margfalda upprunalega upphæð sína.

Lögreglan á höfuðborgarsvæðinu segist hafa fengið málið á sitt borð um hádegisbil á laugardag. Samkvæmt heimildum fréttastofu var ráðist í handtökur fyrir hádegi á sunnudaginn og sólarhring síðar var farið fram á gæsluvarðhald yfir mönnunum fimm.

Héraðsdómur hafnaði beiðni lögreglu um gæsluvarðhald á grundvelli rannsóknarhagsmuna og Landsréttur staðfesti þann úrskurð í dag. Þar virðist hafa skipt sköpum að erfitt var fyrir lögreglu að rökstyðja að rannsóknarhagsmunir væru í húfi enda allar millifærslur milli reikninga skráðar og búið að koma í veg fyrir möguleikann á að svíkja enn meira fé frá bönkunum.

Meðal þess sem lögreglan rannsakar er hvernig mennirnir tengjast og hvort um skipulagt brot hafi verið að ræða.

Hafi ekki átt vitorðsmann

Í svörum frá Reiknistofu bankanna til fréttastofu vegna málsins segir að ljóst sé að nokkrir aðilar hafi með illum ásetningi náð að misnota kerfi stofunnar sem hafi verið með tímabundinn veikleika.

„Um var að ræða veikleika í hugbúnaði sem við notum. Ekki var um svokallaða hökkun að ræða heldur misnotkun á kerfunum. Um leið og við fengum vitneskju um svik var komið í veg fyrir veikleikann og höfum við tryggt að þetta atvik muni ekki endurtaka sig.“

Segir í svörunum að Reiknistofan leggi mikið upp úr góðum undirbúningi fyrir allar uppfærslur kerfa. og er ávallt reynt að sjá fyrir margar ólíkar sviðsmyndir. 

„Í þessu tilfelli náðum við ekki að koma í veg fyrir þennan veikleika tímanlega og hörmum það. RB hefur rekið kerfi fyrir fjármálakerfið í áratugi með góðum árangri. Raunveruleikinn er þó sá að netárásir og svik eru stöðugt að aukast og því höldum við áfram að efla svikavarnir og okkar viðbragðsferli. Það er rétt að taka fram að það er ekkert sem bendir til þess að svikararnir hafi átt viðorðsmann hjá RB.“