Sport

Símon og Birnir slógu Ís­lands­met sín

Sindri Sverrisson skrifar
Birnir Freyr Hálfdánarson á Íslandsmetið í 100 metra flugsundi í bæði 25 metra laug og í 50 metra laug. Hann bætti 19 ára gamalt Íslandsmet Arnar Arnarsonar í vor.
Birnir Freyr Hálfdánarson á Íslandsmetið í 100 metra flugsundi í bæði 25 metra laug og í 50 metra laug. Hann bætti 19 ára gamalt Íslandsmet Arnar Arnarsonar í vor. SSÍ

SH-ingarnir Símon Statkevicius og Birnir Freyr Hálfdánarson slógu í kvöld Íslandsmet sín, á fyrsta degi Íslands- og unglingameistaramótsins í sundi í 25 metra laug.

Mótið fer fram í Laugardalslaug nú um helgina og hófst af krafti í dag.

Símon sló Íslandsmet sitt í 50 metra skriðsundi þegar hann synti á 21,75 sekúndum en gamla metið setti hann einmitt á síðasta Íslandsmeistaramóti í 25 metra laug.

Símon Statkevicius sló Íslandsmet í kvöld.SSÍ

Hið sama má segja um Birni Frey sem sló metið sitt í 100 metra flugsundi með því að synda á 52,41 sekúndum.

Það voru einnig sett Íslandsmet fatlaðra í kvöld og setti Róbert Ísak Jónsson (SH) Íslandsmet í flokki S14 í 100m bringusundi. Þá er einnig vert að nefna að Snævar Örn Kristmannsson (Breiðablik) setti Íslandsmet í 100m flugsundi í flokki S19 í undanrásum í morgun.

Kvöldið einkenndist af sterkum sundum frá mörgum af landsliðsmönnum Íslands, og var ljóst að undirbúningur fyrir Evrópumeistaramótið í 25m laug (EM25) í desember er á réttri leið. Til þessa hafa 9 sundmenn tryggt sér sæti á EM25 í Póllandi: Snæfríður Sól Jórunnardóttir (Aalborg), Snorri Dagur Einarsson (SH), Einar Margeir Ágústsson (ÍA), Símon Elías Statkevicius (SH), Guðmundur Leo Rafnsson (ÍRB), Birgitta Ingólfsdóttir (SH), Jóhanna Elín Guðmundsdóttir (SH), Birnir Freyr Hálfdánarson (SH) og Vala Dís Cicero (SH). Til samanburðar voru sex Íslendingar í EM-hópnum árið 2023.

Íslandsmeistarar kvöldsins:

100m fjórsund kvk: Birgitta Ingólfsdóttir (SH)

100m fjórsund kk: Fannar Snævar Hauksson (ÍRB)

400m skriðsund kvk: Vala Dís Cicero (SH)

400m skriðsund kk: Magnús Víðir Jónsson (SH)

50m baksund kvk: Ylfa Lind Kristmannsdóttir (ÍBR)

100m flugsund kk: Birnir Freyr Hálfdánarson (SH) - Íslandsmet

200m flugsund kvk: Nadja Djurovic (SH)

200m baksund kk: Guðmundur Leo Rafnsson (ÍRB)

200m bringusund kvk: Eva Margrét Falsdóttir (ÍRB)

100m bringusund kk: Snorri Dagur Einarsson (SH)

50m skriðsund kvk: Jóhanna Elín Guðmundsdóttir (SH)

50m skriðsund kk: Símon Elías Statkevicius (SH) - Íslandsmet

Í boðsundum bætti SH enn frekar við sigurflóðið sitt, þar sem lið félagsins unnu bæði 4x200m skriðsund karla og kvenna. Kvennasveit SH skipuðu Nadja Djurovic, Vala Dís Cicero, Birgitta Ingólfsdóttir og Jóhanna Elín Guðmundsdóttir, en karlasveitina skipuðu Ýmir Chatenay Sölvason, Bergur Fáfnir Bjarnason, Magnús Víðir Jónsson og Birnir Freyr Hálfdánarson.

Keppni heldur áfram á morgun, laugardag, með undanrásum frá kl. 9:00 og úrslitum frá kl. 16:30.

Sund

Tengdar fréttir

Mest lesið


Fleiri fréttir

Sjá meira


×

Mest lesið