Þyngdu dóm fyrir stór­felld fíkniefnalagabrot

Landsréttur þyngdi refsingu Mohamed Hicham Rahmi sem sakfelldur var fyrir stórfelld fíkniefnalagabrot. Málið fór fyrir Héraðsdóm þann 21. nóvember 2024 en ríkissaksóknari skaut málinu til Landsréttar þar sem ákæruvaldið krafðist þess að refsing ákærða yrði þyngd. Héraðsdómur hafði úrskurðað Mohamed í fjögurra ára fangelsi en Landsréttur þyngdi dóminn um sex mánuði.

Mohamed var ákærður fyrir að skipuleggja innflutning á 1.988 grömmum af kókaíni af 87 prósenta styrkleika, ætlað til söludreifingar hér á landi. Hann var í slagtogi með þremur öðrum en atburðarásin átti sér stað í júlímánuði 2023. Þann 20. júlí fann tollgæslan hins vegar kókaín sem var í svörtum pokum í tölvuturni og skipti því út fyrir gerviefni. Þegar félagar Mohamed sóttu pakkann, elti lögreglan hópinn og handtók síðan.

Meðal sönnunargagna var sími Mohamed sem hann sagði ekki vera sinn og sagði hann í eigu þriðja manns. Hins vegar kom í ljós að Mohamed var skráður inn á tölvupóstinn sinn í símanum og hafði smellt af einni sjálfu, svo talið var að framburður hans væri ótrúverðugur.

Mikið magn fíkniefna fannst í bifreið og á heimili

Mohamed var einnig dæmdur fyrir að hafa haft 226,5 grömm af kókaíni í fórum sínum ætlað til sölu og dreifingar. Efnin fundust í bíl meðákærðra, annars vegar í öryggisboxi og hins vegar í blárri íþróttatösku. Meðákærandinn benti lögreglu á fíkniefnin og sagði þau í eigu Mohamed.

Hann viðurkenndi fyrir lögreglu að eiga öryggisboxið og sagði í því væri um hálf milljón króna. Eftir að honum var tjáð að þar hefðu ekki fundist peningaseðlar viðurkenndi hann að þar væri kókaín. Á lyklakippu Mohamed mátti einnig finna lykilinn að öryggisboxinu. Í skýrslu sinni fyrir héraðsdómi sagðist Mohamed hins vegar ekki eiga öryggisboxið né íþróttatöskuna, líkt og meðákærandinn sagði. Framburðurinn þótti þó ekki trúverðugur og var hann sakfelldur fyrir vörsluna.

Þann 23. júlí fundust einnig 234,45 grömm af kókaíni, 498,33 gömm af hassi, 4,75 grömm af metamfetamíni, 555 stykki af alprazolam Krka eins milligramma töflum og fjórir millilítrar af testósteróni. Mohamed játaði í skýrslutöku hjá lögreglu að hann ætti fíkniefnin á baðherbergi, svefnherbergi og eldhúsi í íbúð sem hann hafði á leigu. Hann sagðist hafa stolið efnunum nokkrum dögum áður en hann var handtekinn. Meðákærandinn í Héraðsdómi sagði að Mohamed væri með efnin í sínum fórum til að selja þau.

Hefur áður komist í kast við lögin

Þegar Landsréttur ákvarðaði dóminn var litið til að innflutningur fíkniefnanna var í ágóðaskyni og einkenndist af sterkum brotavilja þar sem Mohamed skipulagði innflutninginn. Þá er þetta ekki í fyrsta skipti sem hann kemst í kast við lögn. 

Þann 9. september 2019 var hann dæmdur í eins og hálfs árs fangelsi í Svíþjóð fyrir fíkniefnasmygl og hefur sá dómur einnig ítrekunaráhrif hér á landi. Þá var hann dæmdur í þriggja ára fangelsi þann 30. júní 2021 fyrir stórfellt fíkniefnasmygl.

Landsréttur úrskurðaði Mohamed því í fjögurra og hálfs árs fangelsisvist, að undantöldum dögunum sem hann sat í gæsluvarðhaldi.