Reynir naut sín eftir langt hlé vegna hjartavandamála

Eftir að hafa verið lykilmaður í tvöföldu meistaraliði Fram á síðustu leiktíð fór Reynir til Melsungen, eins af betri liðum Þýskalands, í sumar.

Fljótlega kom hins vegar í ljós að hann væri með gollurhússbólgu og var honum þar með bannað að æfa og keppa.

Reynir sagði hins vegar í viðtali við Sýn í lok október að bjartari tímar væru fram undan og nú er hann kominn á ferðina.

Reynir skoraði fimm mörk í kvöld í 35-34 sigri á sænska liðinu Karlskrona, og var á meðal markahæstu manna Melsungen.

Melsungen hafði þegar tryggt sig áfram upp úr sínum riðli og gat því leyft sér að hvíla leikmenn á borð við Arnar Frey Arnarsson sem tók ekki þátt í leiknum. Ólafur Guðmundsson og Arnór Viðarsson voru ekki heldur með Karlskrona sem er án stiga á botni E-riðils þegar ein umferð er eftir. 

Í sama riðli tapaði Benfica á útivelli gegn FTC, 33-31, þar sem Stiven Valencia skoraði þrjú marka Benfica. Melsungen er efst með 10 stig, Benfica er í 2. sæti með 6 stig og einnig á leið áfram, og FTC í 3. sæti með 4 stig.

Kristján Örn Kristjánsson skoraði eitt marka SAH sem tapaði á heimavelli gegn Granollers, 28-29, en endar í efsta sæti C-riðils engu að síður.