Frum­sýna skemmti­legan gæða­leik­mann í Breið­holti

Kjartan Atli Kjartansson, þjálfari Álftnesinga, ræddi um þennan nýja leikmann, Rati Andronikashvili, sem verður í eldlínunni gegn ÍR í Breiðholtinu í kvöld.

„Rati er mjög skemmtilegur leikmaður. Hann er búinn að vera í þessu sterka georgíska landsliði og þeir Haukur [Helgi Pálsson] eru báðir að koma úr því að spila ansi margar mínútur. Það segir manni hvað þessi landsleikjahlé eru oft „tricky“. Sumir eru að koma úr miklum spiltíma og stórum hlutverkum en aðrir bara búnir að vera að æfa.

Rati kemur inn í liðið með margt. Þess vegna fengum við hann til okkar. Hann stýrir leiknum vel, er mjög góður í vörn og bara gæðaleikmaður. Hann hefur ekkert spilað með félagsliði á þessari leiktíð og við sjáum bara til hversu hratt við náum honum í leikform en hann spilaði með georgíska landsliðinu núna í landsliðsglugganum,“ sagði Kjartan við Vísi.

Ljóst er að koma Andronikashvili styrkir enn Bónus-deildina sem að sögn Kjartans hefur aldrei verið sterkari:

„Deildin er alltaf að stækka og það eru mjög margir öflugir leikmenn hérna. Í hverju liði eru leikmenn sem að hefðu ekkert verið í deildinni þegar ég var að spila í henni. Gæðin aukast með ári hverju og það væri mjög áhugavert að vita hvernig deildin stæði í samanburði við aðrar deildir. Við sjáum Stólana gera mjög vel í sinni Evrópukeppni. Við höfum verið að fara til Króatíu og Portúgals á undirbúningstímabilinu, þrjú ár í röð, og spilað við sterk lið á meginlandinu og við sjáum að deildin okkar er að verða mjög samkeppnishæf við sterk lið í Evrópu,“ sagði Kjartan, ánægður með að nú sé aftur spilað eftir landsleikjahléið:

„En það var fínt að fá smá hlé í þetta. Hlutirnir gerast svolítið hratt fyrstu vikurnar á mótinu og gott að komast aðeins í burtu frá leiknum. Við tókum okkur þriggja daga frí og menn fengu smáhlé frá hefðbundnum æfingum og leikjum, sem er bara mjög gott.“

Leikur ÍR og Álftaness hefst klukkan 19:15 í kvöld og er sýndur á Sýn Sport Ísland 3. Allir leikir kvöldsins eru svo á Skiptiborðinu á Sýn Sport Ísland.

„ÍR-ingar eru mjög öflugt lið. Borche og ÍR er eitthvað sem passar rosalega vel saman. ÍR-liðið endurspeglar rosalega vel það sem ÍR hefur staðið fyrir; vinnusemi, dugnað og kraft. Þetta er rosalega öflugt lið og eins og allir leikir í þessari deild þá verður þetta jafn og spennandi leikur. Það verður gaman að fara í Breiðholtið í kvöld,“ sagði Kjartan.