„Sam­rýmist að miklu leyti okkar sýn“

Þessi ummæli hefur Guardian eftir Dmítríj Péskov talsmanni rússnesku ríkisstjórnarinnar. Þau eru viðbrögð við nýbirtri þjóðaröryggisstefnu sem stjórnvöld í Washington birtu á föstudaginn þar sem samband Bandaríkjanna og Rússlands er sagt forgangsatriði, sem og að kynda undir óstöðugleika innan lýðræðisríkja Evrópu.

Bandaríkjastjórn segir Evrópuríki þagga niður í andstöðu og sýna af sér alræðistilburði á sama tíma og Trump Bandaríkjaforseti stendur í málaferlum við alla helstu fjölmiðla Bandaríkjanna sem allir helstu greinendur sammælast um að sé blanda af fjárkúgun og ritskoðun.

Fagnað í Kreml

Nýkynntar áherslur Trumpstjórnarinnar í alþjóðamálum hafa fallið mjög vel í kramið hjá Pútín.

„Breytingarnar sem við erum að sjá eru að miklu leyti í samræmi við okkar sýn,“ er haft eftir Péskov.

Hann fagnaði því ákaft að Trumpstjórnin vildi þétta böndin landanna á milli. Hann varaði í leiðinni við því að „djúpríkið“ svokallaða myndi leggja sig fram við að spilla framtíðarsýn Trumps.

Tengdasonurinn og gamli golffélaginn

Þjóðaröryggisstefnan var birt á meðan fulltrúar Úkraínu funduðu með golffélaga Trumps sem hann hefur gert sérstakan erindreka og tengdasyni Trumps í Miami. Fundarmenn segja ýmislegt jákvætt hafa komið fram á fundinum en lítið bendir til þess að áþreifanlegum árangri hafi þar verið náð.

Vólódímír Selenskí Úkraínuforseti heldur til Bretlands á morgun, mánudag, þar sem hann mun funda með Keir Starmer forsætisráðherra, Emmanuel Macron Frakklandsforseta og Friedrich Merz Þýskalandskanslara í Downing-stræti og upplýsa þá um stöðu yfirstandandi viðræðna milli bandarískra og úkraínskra erindreka um mögulegan friðarsáttmála.