„Hvað getur Slot gert?“

Stórstjarna Liverpool Mo Salah ferðaðist ekki með Liverpool yfir til Mílanóborgar þar sem liðið mætti Inter í Meistaradeild Evrópu í gærkvöldi og vann 1-0 útisigur.

Mikið kurr hefur verið í kringum leikmanninn hjá félaginu eftir að Egyptinn mætti í viðtal eftir 3-3 jafntefli gegn Leeds um helgina. Þá var Salah á varamannabekknum þriðja leikinn í röð. Salah birti þessa mynd á samfélagsmiðlinum X-inu í morgun þar sem sjá má hann einan á æfingasvæði félagsins. Margir telja að Salah spili ekki meira með Liverpool en eftir leik liðsins gegn Brighton í ensku úrvalsdeildinni heldur Salah út á Afríkukeppnina með Egyptum.

„Ég reikna með að hann verði ekki í hóp í þeim leik heldur. Ekki nema eitthvað mikið breytist og það komi út einhver opinber afsökunarbeiðni,“ segir Albert Brynjar Ingason knattspyrnusérfræðingur Sýnar í Sportpakkanum í gærkvöldi.

„Hvað getur Slot gert? Hann getur misst allan trúverðugleika að henda honum bara aftur inn í hóp án þess að fá einhvers konar afsökunarbeiðni. En gengi Liverpool er skelfilegt á tímabilinu. Ef Slot verður látinn fara þá gæti staða Salah breyst. Svo sjáum við hvað er að gerast hjá Real Madrid. Það er talað um að leikur Real á móti City í Meistaradeildinni gæti orðið úrslitaleikur hjá [Xabi] Alonso með hans framtíð. Við gætum allt í einu séð það í janúar að Alonso verði kominn til Liverpool og þá gæti þetta allt breyst með Salah,“ segir Albert.