Breiða­blik - Shamrock Rovers 3-1 | Sex­tíu milljónir og fyrsti sigur í höfn

Breiðablik vann frábæran 3-1 sigur gegn Shamrock Rovers í Sambandsdeild Evrópu í fótbolta á Laugardalsvelli í kvöld. Þetta er fyrsti sigur liðsins í deildarkeppni Sambandsdeildarinnar og hann færir liðinu 400.000 evrur, jafnvirði um 60 milljóna króna.

Graham Burke kom írsku meisturunum yfir á 32. mínútu en nánast strax í kjölfarið náði Viktor Örn Margeirsson að jafna metin fyrir Blika, eftir frábæra fyrirgjöf Óla Vals Ómarssonar.

Það var svo Óli Valur sjálfur sem kom Blikum yfir, korteri fyrir leikslok, áður en Kristinn Jónsson innsiglaði sigurinn með skoti af löngu færi í autt mark gestanna sem sent höfðu markvörðinn fram í von um jöfnunarmark úr hornspyrnu.

Breiðablik er því núna með fimm stig og á enn von um að komast áfram í útsláttarkeppnina en þarf væntanlega sigur gegn Strasbourg í Frakklandi í lokaumferðinni eftir viku.

Atvik leiksins

Þriðja mark Blika en Kristinn Jónsson skoraði í tómt mark af ansi löngu færi. Sjaldan hefur bolti verið jafn lengi að renna í netið. Virkilega sætt að sjá.

Stjörnur og skúrkar

Óli Valur Ómarsson var ansi öflugur í kvöld fyrir Blika. Stoðsending í fyrsta markinu og skoraði svo frábært mark þegar Blikar náðu forystunni.

Arnór Gauti Jónsson var flottur á miðjunni, fastur fyrir og lét finna vel fyrir sér.

Ágúst Orri Þorsteinsson er alltaf hættulegur fram á við með hraðann sinn og tæknilega færni.

Stemning og umgjörð

Umgjörðin er alltaf góð á Laugardalsvelli. Uppáhaldið mitt persónulega var Bæjarins Bestu básinn inni áður en farið er í stúkuna.

Það var fín mæting hjá stuðningsmönnum Blika og heyrðist vel í þeim. Það voru svo um það bil 250 írskir stuðningsmenn sem mættu á klakann til að horfa á sitt lið. Í upphafi leiks mátti heyrast vel í þeim en það dalaði í síðari hálfleiknum.

Dómarar

Dómarateymi kvöldsins var frá Albaníu. Enea Jorgji var á flautunni, honum til aðstoðar voru Denis Rexha og Ridiger Cokaj. VAR dómarar voru þeir Gianluca Aureliano frá Ítalíu og honum til aðstoðar VAR Kreshnik Barjamaj. VAR kom hins vegar ekkert við sögu.

Flott dómgæsla en aðstæður voru auðvitað erfiðar. Engin vafamál og því gott kvöld fyrir Enea Jorgji.

Viðtöl

Óli Valur Ómarsson: „Mikilvægur sigur upp á framhaldið“

„Tilfinningin er virkilega góð, okkur finnst eins og við höfum átt að ná þessu fyrr en loksins kom sigurinn og hann er mjög mikilvægur upp á framhaldið,“ sagði Óli Valur Ómarsson, leikmaður Breiðabliks, sem átti stórleik í kvöld gegn Shamrock Rovers.

„Mér fannst við bregðast vel við eftir markið, við vorum dálítið sofandi framan af. Við vorum ekki alveg að ná að klukka þá og pressan gekk illa. Það var ógeðslega mikilvægt eftir frekar þreytt mark í byrjun.“

„Það var virkilega sætt að koma okkur yfir. Við vorum búnir að liggja aðeins á þeim þarna og mér fannst við eiga þetta inni.“

Kristinn Jónsson skoraði þriðja mark Blika langt utan af velli. Óli Valur var aleinn fremst á vellinum og beið eftir sendingunni sem kom aldei.

„Nei ég var ekki ósáttur ég held ég hafi verið rangstæður þar sem markvörðurinn var eitthverstaðar lengst í burtu. Það var fínt að Kiddi skoraði en ég hefði verið brjálaður ef hann hefði ekki sett hann. Þetta var flott hjá honum, ég hef aldrei séð svona hægt mark því hann rúllaði svo hægt inn. Ég hélt í smá að hann væri að fara framhjá því það leit þannig út frá mínu sjónarhorni en það var sætt að sjá hann í netinu og innsigla sigurinn.“

Ólafur Ingi Skúlason, þjálfari Breiðabliks: „Ekki fal­legt en mjög sætt engu að síður“

Kristinn Jónsson: „Að hitta var bara númer eitt, tvö og þrjú“

Höskuldur Gunnlaugsson, fyrirliði Breiðabliks: „Kíkja í þetta jólaþorp og gera sér smá desemberferð til Frakk­lands“