Sumir hneykslast á hegðun heims­meistarans

Carlsen sló fast í borðið þegar hann áttaði sig á tapinu gegn Arjun Erigaisi í undankeppni heimsmeistaramótsins í atskák. Myndbönd af atvikinu sem meðal annars Fide, Norway Chess og ChessBase India birtu hafa fengið margar milljónir áhorfa á samfélagsmiðlum eins og Instagram og TikTok.

Norðmaðurinn róaðist fljótt og tók í höndina á Erigaisi. Dómarinn Chris Bird, sem bar ábyrgð á borði Carlsens, skrifaði á X að Carlsen hefði beðið bæði hann og Erigaisi afsökunar eftir atvikið.

Stórmeistarinn Levon Aronian, sem tók þátt í heimsmeistaramótinu í ár, ákvað sjálfur að svara færslunni en norska ríkisútvarpið segir frá.

Ættum ekki að normalísera svona reiðiköst

„Chris, mér finnst við ættum ekki að normalísera svona reiðiköst. Þetta hefur áhrif á skákmenn sem eru í miðri skák og heyra hávaða. Í mörgum íþróttum er slíkum atvikum refsað sem óíþróttamannslegri hegðun, til að senda skilaboð til yngri íþróttamanna,“ skrifaði Aronian.

Þetta er ekki í fyrsta sinn á árinu sem Carlsen hefur slegið hendinni í borðið eftir tap. Hann gerði það sama þegar hann tapaði skák gegn Dommaraju Gukesh á Norway Chess.

Það hefur samt ekki batnað mikið

„Ég er fyrstur til að viðurkenna að ég tekst ekki alltaf jafn vel á við það að tapa. Fyrir nokkrum árum var tímapunktur þar sem ég hugsaði að mér fyndist ég hafa orðið betri í að takast á við tap, en það hefur samt ekki batnað mikið,“ sagði Carlsen við NRK eftir að hann gat lokið meistaramótinu með gulli í bæði hrað- og atskák.

„Þetta snýst ekki bara um hvað lítur vel eða illa út. Margir hafa skoðanir á því, en enginn annar skákmaður veit hvernig það er að vera ég, og pressan sem ég og aðrir setja á mig. Það gerir þetta svolítið öðruvísi,“ sagði Carlsen.

Skákdómarinn og skáksérfræðingur NRK, Kristoffer Gressli, telur að viðvörun hefði verið nóg í tilfelli höggs Carlsens, með þeim skilaboðum að hann hefði getað fengið stærri refsingu, eins og sekt, við endurtekin atvik.

Truflar 400 aðra skákmenn

„Því það truflar 400 aðra skákmenn. Þá er ekki hægt að leyfa slík reiðiköst, óháð því hvort það er á efsta borði eða ekki. Það er mikilvægt að vera samkvæmur sjálfum sér. Eitt mikilvægasta starf skákdómara er að tryggja góðar aðstæður fyrir alla skákmenn,“ segir Gressli.

Carlsen vakti einnig athygli fyrr á heimsmeistaramótinu þegar hann ýtti myndavél ljósmyndara NRK frá sér.

„Það er ótrúleg pressa á honum og ég skil líka að hann útskýri reiðiköstin sín með því. Hann hefur rétt fyrir sér í því, að enginn getur alveg sett sig í spor hans,“ segir skáksérfræðingur NRK, Torstein Bae.

Hann upplifir að það sé, sérstaklega í Noregi, ákveðin viðurkenning á hegðun Carlsens.

„Fæstir bregðast mjög harkalega við því að hann ýti við myndavél og þess háttar. Almennt er skilningur á því að hann sé undir sérstakri pressu og sé alveg sérstakur íþróttamaður, og að menn sætti sig við suma hluti sem þeir myndu kannski bregðast harðar við ef ekki væri fyrir þessar víddir,“ segir Bae.