Skoðar stöðuna eftir helgi og hefur ekki á­hyggjur af Bjarka

„[Bjarki Már] verður með á æfingu á mánudaginn. Þetta var bara eitthvað svona smáræði og varúðarráðstöfun að hafa hann ekki með í dag. Við tókum þessa ákvörðun í samræmi við sjúkraþjálfarana, þetta riðlaði æfingunni ekkert þannig séð, þannig að ég var bara sammála því.

Bjarki hefði alveg getað æft en það var ekki ástæða til og þess vegna fékk hann pásu frá gólfinu“ sagði landsliðsþjálfarinn í samtali við Vísi. 

Bjarki Már hefur verið að glíma við meiðsli í kálfa í vetur og Handkastið greindi frá því að hann hefði ekki tekið þátt á æfingu liðsins í morgun.

„Hann er alveg búinn að ná sér af því en það var einhver stífleiki. Hann er búinn að æfa aðeins öðruvísi heldur en strákarnir í Þýskalandi. [Ungverska liðið Vesprém] fer fyrr í jólafrí þannig að hlutirnir eru aðeins öðruvísi hvað hann varðar, en eins og ég segi var þetta bara varúðarráðstöfun“ bætti Snorri við.

Landsliðsþjálfarinn mun svo taka ákvörðun um það eftir helgi hvort annar leikmaður verði kallaður inn í hópinn í stað Kristjáns Arnar.

Donni dró sig úr landsliðshópnum vegna meiðsla og í samtali við Handkastið sagðist hann hræddur um að kviðslit væri vandamálið.

„Ég ætla aðeins að melta það. Auðvitað fer það líka aðeins eftir Þorsteini Leó [Gunnarssyni, sem er að jafna sig af nárameiðslum]. 

Steini verður væntanlega ekki með í næstu viku en nei, þetta er ekki þannig að ég ætli að hlaupa upp til handa og fóta og kalla einhvern inn. Ekki eins og stendur. Auðvitað er planið að fara með átján heila til Svíþjóðar en ég ætla aðeins að melta þetta.“

Nú stendur eftir nítján manna hópur, með þremur markmönnum og meiddum Þorsteini Leó Gunnarssyni. Landsliðshópinn má sjá hér fyrir neðan.