Gæti hætt snemma eins og Björn Borg

Fyrrum Wimbledon-meistarinn Marion Bartoli hefur lýst yfir áhyggjum af því að spænski tenniskappinn Carlos Alcaraz gæti hætt snemma í tennis eins og Svíinn Björn Borg gerði á sínum tíma.

Þessar áhyggjur vöknuðu hjá Bartoli eftir að leiðir Alcaraz og þjálfarans Juan Carlos Ferrero skildu.

Skildi við þjálfara sinn

Alcaraz og aðalþjálfari hans, Ferrero, slitu nýverið löngu og farsælu samstarfi sínu. Þeir skildu formlega að skiptum í desember 2025 og bundu þar með enda á sjö ára samstarf.

Ferrero hefur nú rofið þögnina um brottför sína og heldur því fram að ákvörðunin hafi ekki verið Alcaraz, heldur teymis efsta manns heimslistans.

„Þar sem ég veit að Juan Carlos er mikill fagmaður – hann var það líka sem leikmaður – er ég viss um að hann krefst algerra skuldbindinga frá leikmönnum sínum og að kröfur hans um fagmennsku séu mjög miklar. Sennilega, í ljósi þess að Carlos er spænskur, mjög ungur og laðast að öllum ytri freistingum – hefur verið erfitt að vinna með hann undanfarið,“ sagði Yevgeny Kafelnikov, fyrrum efsti maður heimslistans.

Allar stelpurnar eru á eftir honum

„Það er skiljanlegt – hann er 22 ára, allar stelpurnar eru á eftir honum, það er frægðin og allt sem henni fylgir. Enginn gæti staðist það á svo ungum aldri. Juan Carlos sá það líklega og var að reyna að aðskilja æfingar og tennis frá öllum hávaðanum. Þaðan, frá mínu sjónarhorni, er líklegt að ágreiningurinn hafi komið upp,“ sagði Kafelnikov.

Fyrrnefndur Bartoli óttast það líka að tennisheimurinn gæti misst einn sinn öflugasta og vinsælasta leikmann.

„Ég hef áhyggjur, en í hófi. Carlos býr yfir einstökum hæfileikum en hann þarf skipulag. Annars gæti hann endað á því að hætta í tennis eins og Björn Borg, 25 ára gamall,“ sagði Marion Bartoli.

Tennisíþróttin hefur ekki efni á að missa hann

„Alcaraz er snillingur og tennisíþróttin hefur ekki efni á að missa hann svona snemma,“ sagði Bartoli.

Hann vonast eftir því að Alcaraz og Juan Carlos Ferrero fari að vinna aftur saman. Að hans mati gæti ákveðin atburðarás flýtt fyrir öllu að mati Bartoli en það eru yfirburðir Ítalans Jannik Sinner.

„Ef Sinner vinnur Opna ástralska meistaramótið og Opna franska meistaramótið mun Carlos strax hringja í Juan Carlos Ferrero aftur. Það er augljóst,“ sagði Bartoli.

Gekk út eftir tap í úrslitaleik

Hinn sænski Björn Borg var í fyrsta sæti heimslistans í einliðaleik karla í 109 vikur og vann 66 titla í einliðaleik á ferlinum. Þar af voru ellefu risatitlar, sex á Opna franska meistaramótinu og fimm í röð á Wimbledon.

Eftir að hafa tapað fyrir John McEnroe í úrslitum Wimbledon-mótsins og Opna bandaríska meistaramótsins árið 1981 hætti Borg óvænt í tennis, aðeins 25 ára gamall. Hann, sem var þá stærsta tennisstjarna heims, gekk út af leikvanginum eftir seinna tapið án þess að tala við fjölmiðla og fyrir stutta endurkomu áratug síðar keppti hann aldrei aftur meðal þeirra bestu.