„Ís­land hafi aldrei átt jafn góða mögu­leika á að komast í undan­úr­slit“

Logi ræddi leið íslenska landsliðsins að mögulegum verðlaunum á mótinu í ár í Biðstofunni á RÚV en íslensku strákarnir virðast hafa verið mjög heppnir með mótherja að þessu sinni samkvæmt erlendum fjölmiðlum sem Logi hefur verið að skoða vel fyrir mótið.

„Við erum taldir af 24 liðum, fimmta besta liðið. Fimmta líklegasta liðið til þess að vinna þetta mót,“ sagði Logi Geirsson.

„Fjölmiðlar erlendis, sem ég er búinn að skoða mikið núna undanfarið, hafa verið að segja að þetta séu tvær leiðir í þessu móti. Við erum með Ítalíu, Póllandi og Ungverjalandi í riðlinum. Svo förum við bara í Svíþjóð, Króatíu, Slóveníu og Færeyjar, allar ríkjandi í milliriðlinum. Það er mín von,“ sagði Logi.

Sleppa við bestu liðin

„Þannig að við sleppum við fjórfalda heimsmeistara, Dani. Við sleppum við ríkjandi Evrópumeistara, Frakka, Spánverja, Þýskaland. Þetta eru lið sem geta ekki einu sinni mætt okkur fyrr en í undanúrslitum,“ sagði Logi.

„Það er verið að tala um það að Ísland hafi aldrei átt jafn góða möguleika á að komast í undanúrslit,“ sagði Logi.

„Við eigum okkur alveg rétt á að dreyma af því að liðið hefur unnið sér bara inn þann rétt og á þann stað. Að vera mjög sterkt og geta náð góðum úrslitum,“ sagði Logi.

Draumurinn er verðlaun

„Ég er bara búinn að sjá þetta fyrir mér sem svona þrjú lög væntinga. Lágmarkið er náttúrulega að komast upp úr riðlinum. Raunhæfa markmiðið er átta liða úrslit, undanúrslit og draumurinn er verðlaun,“ sagði Logi.

„Þetta finnst mér bara mjög raunhæft. Ég velti fyrir mér líka, hvernig fer þetta fram í liðinu? Ef ég væri inni í klefa. Ég spegla þetta mikið bara í okkar tíma. Hversu margir sitja inni í klefa þegar er verið að setja markmiðin og trúa þeir geti unnið medalíu? Nei, ég bara raunverulega velti þessu fyrir mér,“ sagði Logi.

Fyrsti leikur íslenska landsliðsins er á móti Ítalíu 16. janúar næstkomandi eða á föstudaginn í næstu viku.