Innlent

Vonast til stöðug­leika eftir mikið umrótarár í ráðu­neytinu

Hallgerður Kolbrún E. Jónsdóttir skrifar
Magnús Þór Jónsson formaður KÍ vonast til rólegri tíma í menntamálaráðuneytinu nú þegar þriðji ráðherrann er tekinn við á einu ári.
Magnús Þór Jónsson formaður KÍ vonast til rólegri tíma í menntamálaráðuneytinu nú þegar þriðji ráðherrann er tekinn við á einu ári. Vísir

Formaður Kennarasambandsins hvetur nýjan menntamálaráðherra til að líta heildstætt á skólamálin frekar en að kenna einni ákveðinni kennsluaðferð um skólavandann. Hann vonar að nú skapist stöðugleiki í ráðuneytinu eftir mikið rót undanfarna tólf mánuði.

Inga Sæland félags- og húsnæðismálaráðherra tekur við embætti mennta- og barnamálaráðherra á ríkisráðsfundi á morgun eftir að Guðmundur Ingi Kristinsson tilkynnti afsögn sína vegna veikinda. Inga er þriðji menntamálaráðherra Flokks fólksins á einu ári.

„Við vonumst eftir því að hér verði aðeins meiri stöðugleiki það hafa verið miklar vendingar í menntamálaráðuneytinu síðustu tólf mánuðina,“ segir Magnús Þór Jónsson, formaður Kennarasambands Íslands.

„Auðvitað er það þannig að það að skipta um fólk kemur ákveðinn biti, óstöðugleiki, sem við treystum á að sé nú að baki.“

Hvergi meiri umræða um læsi

Í viðtölum í gærmorgun sagði Inga að kerfið hafi alfarið og algjörlega brugðist börnum og að byrjendalæsisstefnan svokallaða hafi valdið því hve stór hluti barna, þá sérstaklega drengja, sé ólæs.

„Hvergi annars staðar í samfélaginu hefur verið meiri umræða um þetta verkefni varðandi læsi og læsi drengja, en meðal félagsfólks Kennarasambandsins allt frá leikskóla upp í framhaldsskóla,“ segir Magnús Þór og væntir þess að þetta verði eitt af þeim stóru verkefnum sem hann muni ræða við ráðherrann.

Engar skyndilausnir

Ýmislegt hafi verið gert í þessum málum sem hann væntir að starfsfólk ráðuneytisins fari yfir með nýjum ráðherra.

Mikil óánægja er meðal kennara vegna ummæla Ingu og sköpuðust miklar umræður um þau á Skólaþróunarspjallinu á Facebook í gær. Þar var Inga meðal annars hvött til að kynna sér málin áður en svo stórum yfirlýsingum væri fleygt fram og ummælin sögð skammarleg.

„Skyndilausnir og yfirlýsingar um einhver átök hafa í gegnum tíðina ekki skilað. Það að telja vandann vera auðleysanlegan með einu handtaki, það hefur sýnt sig í gegnum tíðina að það virkar ekki.“

Skóla- og menntamál Ríkisstjórn Kristrúnar Frostadóttur Flokkur fólksins Grunnskólar Afsögn Guðmundar Inga Kristinssonar

Tengdar fréttir

Brösug og stutt ráðherratíð Guðmundar Inga

Eftir tæplega tíu mánaða embættisferil sem einkenndist meðal annars af óheppilegum ummælum, umdeildum embættisfærslum og upplýsingastríði við Moggann hefur Guðmundur Ingi Kristinsson sagt af sér sem mennta- og barnamálaráðherra vegna veikinda. Hann gekkst undir hjartaaðgerð fyrir áramót og kveðst nú á batavegi. 

Símabann skilað góðum árangri þó sumir stelist í símann

Skólastjóri Álftamýrarskóla segir samræður á milli nemenda hafa aukist gífurlega eftir að símabann var sett á í skólanum. Lítið sé um að nemendur flýi skólalóðina til að komast í símann þó að nemendur viðurkenni að þó nokkrir eigi erfitt með að sleppa símanum.

„Ég er sátt“

„Þetta leggst vel í mig. Þetta er stórt hlutverk og stærra en almenningur gerir sér oft grein fyrir. Ég hlakka til að takast á við þetta. Ég tek við þessu af Ragnari Þór og hann hefur verið einstaklega góður í þessu hlutverki svo ég stór fótspor að feta í.“

Mest lesið


Fleiri fréttir

Sjá meira


×

Mest lesið