Silja sú fyrsta og eina til þessa: „Ég er íþrótta­sjúk“

„Mér finnst okkur vanta fleiri íþrótta­hetjur hérna heima,“ segir Silja í viðtali hjá íþrótta­deild Sýnar. 

„Ég er alltaf ein­hvern veginn að leita leiða til þess að finna þær, koma þeim á fram­færi og þess háttar. Miðað við allt sem ég er að gera dags dag­lega í lífinu þá passar þetta bara mjög vel þar inn,“ segir Silja.

„Um­boðs­skrif­stofan mín heitir Klefinn Agen­cy og ég er ekkert bara að leitast eftir því að vinna með frjálsíþrótta­fólki, heldur einnig íþrótta­fólki úr öðrum greinum. Mig langar að reyna koma þeim á fram­færi, búa til tekjur fyrir þau og hjálpa þeim að komast í sam­störf. Lyfta þeim upp því þá fáum við fleiri fyrir­myndir, það aug­lýsir íþrótta­greinarnar og vonandi verður þá bara allt of mikið að gera hjá ykkur íþrótta­frétta­mönnunum,“ segir Silja.

Hefur setið alls staðar við borðið

Silja hefur eins og hún kemur sjálf inn á komið víða við á sínum ferli en brýtur nú blað í sögunni með því að gerast um­boðs­maður, sá fyrsti og eini af ís­lensku þjóðerni sem er vottaður af Alþjóða frjálsíþrótta­sam­bandinu. Eftir að hafa sjálf átt frábæran feril sem íþrótta­kona hefur hún síðan þá miðlað reynslu sinni með ýmsum hætti.

„Ég er náttúru­lega bara íþrótta­sjúk. Er búin að vera íþrótta­kona, búin að vera sölu- og markaðs­stjóri íþrótta­vöru­merkis og búin að halda stóra viðburði. Ég er ein­hvern veginn búinn að sitja alls staðar við borðið en held að þetta hafi verið eini auði stóllinn. Ég er þjálfari líka og allt þetta. Ég vil sjá öðrum vegna vel, vil að íþrótta­fólk fái plássið sitt og vil að þið öll vitið hvað við eigum ótrú­lega mikið af flottu íþrótta­fólki í öllum íþrótta­greinum.“

Og nýtur hún góðs af tengslum frá fyrri tíð við um­boðs­manninn þekkta, Paul Doy­le, sem var á sínum tíma þjálfari frjálsíþrótta­konunnar Guðrúnar Arnar­dóttur sem var tekinn inn í heiðurs­höll ÍSÍ árið 2022 og á enn Ís­lands­met í 400 metra grinda­hlaupi.

„En ég er samt heppin því þegar að ég bjó í Bandaríkjunum á sínum tíma, eftir háskólanám mitt þar, fór ég og æfði með þjálfara Guðrúnar Arnar­dóttur, Paul Doy­le, sem var þá einnig stærsti um­boðs­maður í heimi í frjálsum íþróttum. Ég naut góðs af því að vera á hliðar­línunni með honum, að­stoða hann og hjálpa til. Hann var mjög þreyttur á öllum spurningunum mínum og veit enn að ég er á þeim stað. En hann ætlar sem sagt að vera minn mentor í þessu og er enn með allt frjálsíþrótta­fólkið sem þú þekkir á sínum snærum. Hann opnar dyrnar fyrir mig, gaf mér tengiliði og ég fékk að­gang að hans gögnum. Með allt þetta í höndunum verð ég að prófa þetta.“

Fyrirspurnir hrúgast inn

Silja ætlar að ein­beita sér að ís­lensku íþrótta­fólki fyrst um sinn, hjálpa þeim að ná lengra í gegnum um­boðs­mennskuna eftir að hafa hlotið vottun frá Alþjóða frjálsíþrótta­sam­bandinu.

„Ég ætla fyrst að læra að synda. Ég ætla að ein­beita mér á Ís­lendinga núna en What­sAppið mitt er að springa af því nú er nafnið mitt komið inn á ein­hvern gagna­grunn og það eru hlauparar frá Kenía og Ní­geríu sem eru að biðja mig um að hjálpa sér. Ég ætla aðeins að læra þetta, gera þetta vel áður en ég horfi eitt­hvað lengra.“

En af hverju hefur ekki verið starfandi ís­lenskur um­boðs­maður í þessum heimi þar til núna?

„Ég bara veit það ekki. Kannski voru kröfurnar ekki eins miklar á mótum áður fyrr. Ég hef vitað af um­boðsmönnum síðan ég byrjaði í frjálsum og byrjaði að fara er­lendis. Ég hef engin svör við því en þetta er komið núna alla­vegana.“