Ráku þjálfarann eftir enn ein von­brigðin

McDermott hafði verið þjálfari Bills undanfarin níu ár, hann hefur átta sinnum stýrt liðinu inn í úrslitakeppnina og frá því að Josh Allen kom til félagsins fyrir sjö árum hefur liðið alltaf þótt líklegt til að vinna Ofurskálina, en aldrei tekist það.

Margir Bills-menn héldu að þetta væri árið þeirra. Krýptónít þeirra, Kansas City Chiefs, sem hafa slegið Bills úr leik fjórum sinnum á síðustu fimm árum, komst ekki í úrslitakeppnina og allt leit vel út.

Tap varð hins vegar niðurstaðan gegn Denver Broncos á laugardaginn. Bills tókst að snúa stöðunni við, eftir að hafa verið 23-10 undir, og knúa fram framlengingu, en leiknum lauk svo með 33-30 sigri Broncos.

„Sean hefur unnið frábært starf hjá fótboltaliðinu okkar síðustu níu tímabil, en nú teljum við réttan tíma til að endurskipuleggja, til að gefa okkur sem mestan möguleika á að koma liðinu upp á næsta stig“ sagði Terry Pegula, eigandi Bills, en framkvæmdastjórinn Brandon Beane mun fara fyrir leitinni að nýjum þjálfara.