Ung­verjar stoltir eftir slag við „þá bestu í heimi“

Viktor Gísli átti stórkostlegan leik og ekki veitti af því Ísland endaði á að vinna með aðeins eins marks mun, 24-23.

Adrián Sipos, varnartröll Ungverja, sagði að þrátt fyrir harðan slag þætti honum ungverska liðið eiga meira inni en það sýndi í gær.

„Það er erfitt að finna réttu orðin því við veittum þeim mjög jafna keppni og það er frekar merkilegt að ná að halda Íslandi í 24 mörkum,“ sagði Sipos við 24.hu í Ungverjalandi. Hann var greinilega stoltur af því hvernig til tókst við að verjast Íslendingunum sem til að mynda spila með taplausu toppliði Magdeburg í þýsku deildinni, þar sem Sipos spilar með Melsungen.

„Mér finnst við enn eiga meira inni, jafnvel þó að við höfum verið að spila við þá bestu í heimi! Við náðum að mæta þeim stöðugt í gegnum allan leikinn og ef ekki hefði verið fyrir frammistöðu markvarðarins þá held ég að við hefðum getað unnið með nokkrum mörkum,“ sagði Sipos.

Hornamaðurinn Bence Imre, sem spilar með Kiel, var markahæstur Ungverja í gær með sjö mörk en þar af voru fjögur af vítalínunni. Hann kvaðst afar vonsvikinn.

„Mér fannst við verðskulda að minnsta kosti stig. Þetta er mjög sárt. Ég elska að spila fyrir þetta lið og ég held að öllum líði eins. Ef við skoðum leikmannahópana þá held ég að íslenska liðið sé 5-6 mörkum betra en við eyddum þeim mun í sextíu mínútur. Vörnin og auðvitað markvarslan var svo góð,“ sagði Imre.

Þjálfarinn Chema Rodríguez sagði það sama og Sipos, í viðtali við M4, um hve ótrúlegt það væri að ná að halda Íslandi í 24 mörkum. Vörn Ungverja hefði verið stórkostleg.

„Við vorum svo ekki í neinum vandræðum í sókninni til að byrja með en svo blindaði markvörðurinn þeirra okkur. Hann varði nánast allt og við fórum að verða ragir, hættum að fara í einvígin,“ sagði Rodríguez og bætti við að þó að Richárd Bodó hefði komið með nokkur skyttumörk þá hefði liðið þurft að skora fleiri mörk að utan.