Er þrælfyndin og skemmti­leg þótt Viðskiptablaðið hafi sagt annað

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„7.30. Ef ég mætti ráða væri það svona hálftíma seinna. Ég er alveg morgunmanneskja en þetta alræði A-fólksins í þjóðfélaginu finnst mér dálítið ýkt.“

Hvað er það fyrsta sem þú gerir á morgnana?

„Ræsa skólastelpuna ef hún er ekki vöknuð. Svo upphefst mikið verkefni við að reka á eftir henni. Hún labbar með besta vini sínum í skólann og á það til að láta hann bíða dálítið. Ef hann fær seint í kladdann er það undantekningalaust á hennar reikning, svo við foreldrarnir verðum að halda vel á spöðunum.“

Á skalanum 0-10, hversu mikill húmoristi ertu?

„Gaman að þú skulir spyrja að þessu! Ég las nefnilega einhvern tímann í Viðskiptablaðinu að ég væri leiðinleg eða húmorslaus, ég man ekki hvort, kannski hvoru tveggja. 

Ég hef aldrei orðið eins móðguð á ævi minni, enda er ég, að mínu hlutlausa mati, mjög hress og fer með alls konar grín daginn í gegn. 

Ég var til dæmis einu sinni kosin fyndnasta stelpan í Gaggó Mos. Þarf frekari vitni að vita? 

Ég segi 10.“

Í hvaða verkefni ertu að vinna helst þessa dagana?

„Sem formaður stéttarfélags er ég auðvitað með verðbólguna og stýrivexti á heilanum, enda hefur efnahagsumhverfið gríðarleg áhrif á kjör og lífsgæði félagsfólks í VR. Undanfarinn mánuð höfum við verið að grafa ofan í orkuverð, ekki síst eftir að Veitur hækkuðu gjaldskrár sínar upp úr öllu valdi í desember. 

Við erum nýfarin í loftið með hlaðvarp um efnahagsmál sem heitir H fyrir hagfræði og þar tölum við Ásgeir Brynjar Torfason, ritstjóri Vísbendingar, saman um helstu hugtök hagfræðinnar og þau áhrif sem efnahagsstjórn hefur á venjulegt fólk. Við fáum til okkar góða gesti og hugmyndin er að þetta sé á mannamáli, vonandi gengur það upp hjá okkur!

Síðan erum við að fylgja af krafti eftir baráttu okkar gegn hækkun leikskólagjalda og breytingum á leikskólaþjónustu í Reykjavík. Á síðustu árum hafa sífellt fleiri sveitarfélög farið þá leið að takast á við áskoranir leikskólanna með því að varpa byrðum á vinnandi foreldra. Við mótmælum því og höfum fulla trú á því að aðrar leiðir séu færar.“

Hvernig skipuleggur þú þig í vinnu?

„Ég á mínar syrpur þar sem ég er ofsalega skipulögð og er með Planner-lista og To do og allt á hreinu. En svo koma tímabil þar sem ég gleymi að þetta sé til og dagurinn tekur þá stefnu sem hann tekur. 

Ég er svo heppin að vinna með frábæru fólki og þar á meðal er mjög skipulagt fólk sem heldur mér við efnið þegar ég ráfa af leið. 

En annars finnst mér merkilegt hvað áætlanirnar halda þótt ég gleymi að þær séu til. 

Það er eins og þær festist í einhverri undirmeðvitund, dálítið eins og áramótaheitin.“

Hvenær ferðu að sofa á kvöldin?

„Líklega oftast milli ellefu og hálf tólf. En það eru alls konar varíantar á því. Vigdís Finnbogadóttir sagði einhvern tímann í viðtali að hún hefði alla tíð farið mjög snemma að sofa eitt kvöld í viku til að geta haft sína hentisemi hin kvöldin. Það á ágætlega við mig. 

Mér finnst gaman að slæpast á kvöldin, lesa, horfa, spjalla, drekka eða jafnvel bara hanga í símanum yfir samfélagsmiðlum, fréttum eða einhverjum þrautum í NYT appinu; ég mæli með Pips. Ég færi ekkert að sofa fyrr en milli miðnættis og eitt ef ég fengi alveg að ráða rútínunni.“