Um 150 Ís­lendingar í höllinni: „Fjár­hags­lega höfum við ekki bol­magn í að kaupa mörg hundruð miða“

„Þetta er bara ótrúlega leiðinlegt. Við erum búnir að vera í alla nótt að hafa samband við allt og alla. Því miður er fyrirkomulagið þannig hjá EHF að það eru bara hundrað miðar á lið, fyrir þessi fjögur lið sem fara inn í úrslitakeppnina. Svo náðum við í einhverja fimmtíu auka miða. Það er það eina sem við höfum yfir að ráða.“

Fjölskyldur, starfsfólk og styrktaraðilar en engin Sérsveit

Um 150 miðar eru fljótir að fara þegar þeim er dreift út. Fjölskyldur leikmanna, starfsfólk HSÍ, styrktaraðilar og fleiri gera tilkall. Ekki allir nánustu fjölskyldumeðlimir leikmanna fá miða.

„Flestir miðar fara í fjölskyldur leikmanna en við náðum ekki einu sinni að láta leikmenn fá miða fyrir alla sína fjölskyldu meðlimi. Svo eru það allir sem standa að þessu hérna, það er starfsfólk HSÍ og eitthvað af okkar helstu styrktaraðilum [sem fá miða.] Því miður verður það þannig að við verðum bara eitt prósent af áhorfendum [í 15 þúsund manna höllinni í Herning í Danmörku.]“

Einhverjir Íslendingar hafa þó útvegað sér miða með öðrum leiðum, eða áður en ljóst var að Ísland kæmist áfram.

„Ég veit að séra Guðni, hann er miða, einn okkar helsti stuðningsmaður. Við verðum bara að hópast saman í Herning og gera það sem við getum. Svo eins og við sögðum í fréttatilkynningunni þá hvetjum við þjóðina til að senda sterka strauma. Strákarnir eru allir meðvitaðir um þetta og þeir eru leiðir yfir því að fá ekki fleiri Íslendinga í höllina, en það er bara ekkert við þessu að gera, því miður.“

Þá verða engir meðlimir Sérsveitarinnar, stuðningsmannasveitar íslenska landsliðsins, á svæðinu. Nema þeir hafi einhverjir reddað sér miða með öðrum hætti.

„Það er það sem við erum að glíma við. Við erum bara ekki með miða fyrir alla. Við erum samt, eins og ég segi, með alla anga úti. Það getur verið að það verði einhverjir miðar í boði, en það væri þá teljandi á fingrum annarrar handar. Við erum ótrúlega leið yfir þessu en á sama tíma erum við að reyna að setja fókus á verkefnið sjálft sem skiptir mestu máli.“

Hefðu getað tekið frá miða en fjárhagurinn leyfir það ekki

HSÍ hefði þó getað, með nokkurra mánaða fyrirvara, tekið frá miða fyrir stuðningsmenn Íslands.

Þá er kostnaður lagður út og HSÍ eignast miðana en getur sett þá í sölu síðar meir, hvort sem það væri til íslenskra stuðningsmanna ef Ísland kemst áfram eða annarra stuðningsmanna ef Ísland hefði ekki komist áfram. Áhættan er auðvitað að Ísland komist ekki áfram og HSÍ takist ekki að selja alla miðana til annarra þjóða, en sambandið hefði ekki þurft að hafa áhyggjur af því í þessu tilfelli.

Sjá einnig: „Fjár­hags­staðan býður ekki upp á það að við leikum okkur með þann miða­fjölda“

Svipaðar aðstæður komu upp á HM hjá stelpunum okkar í Þýskalandi fyrir áramót. Þá tók HSÍ ekki frá nóg af miðum fyrir alla fjölskyldumeðlimi leikmanna.

„Staðan hjá okkur í Handknattleikssambandinu er bara þannig, eins og ég hef oft komið að, fjárhagslega höfum við ekki bolmagn í að kaupa mörg hundruð miða tíu mánuðum fyrir mót. Sitja með þá, bíða og vona, og kannski ekki losna við þá. Ekki það, við hefðum alltaf losnað við þá núna.“

„Það sem gerðist í desember [á HM kvenna] var að við lentum í riðli með Þjóðverjum, heimaþjóðinni, og það var eini riðillinn sem var uppselt á. En þá náðum við samt að fara út og redda miðum, það gekk betur en er búið að ganga núna.“