Ólafur Darri verður Þór

Til stendur að gera tvær þáttaraðir um söguna, sem á að snúast um nýjustu leikina tvo í God of War seríunni. Sá leikur fjallar um það að Kratos lifir í einangrun með eiginkonu sinni (Faye) og syni (Atreus) í heimi hinna norrænu guða en allt fer í háaloft þegar eiginkona hans deyr og hefjast ákveðnar deilur við norrænu guðina.

Þetta er eftir að Kratos hefur drepið Seif föður sinn og brennt Ólympus til grunna.

Sjá einnig: Guðir verða drepnir hjá Amazon

Þór er á þessum tímapunkti nokkuð niðurbrotinn og drykkfelldur guð.

Í færslu sem hann skrifaði á Facebook í kvöld segist Ólafur Darri hafa skemmt sér konunglega við að spila leikina. Með því að fá að taka þátt í að segja söguna í sjónvarpi með því að leika Þór sé ákveðinn draumur að rætast.

Hann segist ekki geta beðið eftir því að byrja að vinna með öllu því hæfileikaríka fólki sem mun koma að þáttunum.

Áður hafði, samkvæmt Deadline, verið tilkynnt að Ryan Hurst muni leika Kratos en Teresa Palmer mun leika Sif og Max Parker verður Heimdallur.

Hollywood Reporter segir að Mandy Patinkin hafi verið ráðinn til að leika Óðin.

Forsvarsmaður þáttanna er Ronald D. Moore, sem er hvað þekktastur fyrir Battlestar Galactica og Outlander. Tökur eru ekki byrjaðar en þær eiga að fara fram í Kanada.