„Held og vona að Ís­land taki bronsið“

„Við verðum að spila frábæran leik til að eiga möguleika að vinna. Ég skoðaði leikinn hjá Íslandi gegn Dönum og strákarnir spiluðu frábærlega. Það duttu síðan ákveðnir bónusar með Dönum. Það þarf að eiga fullkominn leik til þess að vinna Dani,“ sagði Alfreð en hann mun pottþétt undirbúa sitt lið af kostgæfni.

„Danir eru mjög góðir. Góðir í breiddina og það þarf allt að ganga upp til að vinna þá. Sérstaklega hérna í þessu húsi.“

Akureyringurinn stæðilega hefði líklega frekar viljað mæta sinni heimaþjóð í úrslitaleiknum. Hann er aftur á móti bjartsýnn fyrir hönd íslenska liðsins í bronsleiknum.

„Ég held að Ísland eigi mjög góðan möguleika. Nú fá þeir meiri hvíld og ég held að þeir séu með meiri breidd en Króatía. Ef að vörn og markvarsla er í lagi þá er Ísland með stórkostlegt sóknarlið. Ég held og vona að Ísland taki bronsið.“