Hjartað og andinn muni skila sigri

Arnór segir hafa gengið vel að hrista af sér tapið gegn Dönum á föstudag. Það muni svíða eitthvað áfram en það sé lykilatriði að hafa medalíu til að keppa um.

„Auðvitað var þetta sárt að tapa undanúrslitaleik, á að vera það og má vera það í einhvern tíma. En þegar gulrótin er bronsmedalía þá er auðveldara að rífa sig upp fyrir það. Það eru allir þar að vilja klára þetta almennilega og jafna okkar besta árangur á Evrópumóti,“ segir Arnór.

Ísland er að spila sinn níunda leik á mótinu á skömmum tíma. Það tekur eðlilega á en allir í hópnum eru þó leikfærir.

„Staðan er bara fín, þannig séð. Allir eru klárir í leik, stórleik. Auðvitað eru menn lemstraðir eftir svona rosalega marga leiki á stuttum tíma. En ekkert alvarlegt,“ segir Arnór.

Sigvaldi Björn Guðjónsson var kallaður inn í EM-hópinn í dag eftir að hafa komið til móts við liðið á dögunum. Hann verður á skýrslu í dag og til taks fyrir Óðinn Þór Ríkharðsson sem hefur spilað nánast allar mínútur á mótinu í hægra horninu.

„Sigvaldi verður allavega til taks og ef á þarf að halda þá spilar Sigvaldi.“

Srna farinn og meira 7 á 6

Ísland tapaði með eins marks mun fyrir Króatíu í fyrsta leik í milliriðli í Malmö fyrir viku síðan. Króatar hafa síðan misst út skyttuna Zvonimir Srna sem var bestur þeirra sóknarlega gegn Íslandi.

En býst Arnór við frábrugðnum leik?

„Ef við kíkjum á síðustu leiki þá eru þeir farnir að spila með sjö á móti sex en síðast. Það verður sennilega aðeins meira núna. Þeir hafa auðvitað misst Srna sem spilaði mjög mikið hjá þeim í síðasta leik. Það verður örlítið öðruvísi sóknarleikur en varnarleikur þeirra 5-1 og 6-0 erum við undirbúnir fyrir. Ég er ekki viss um að taktíkin verði allsráðandi. Að það verði lykilatriðið. Það er hjartað og andinn í þessu og þeir sem eiga meira eftir á tanknum,“ segir Arnór.

Engin hefnd per se

Króatar hentu Íslandi úr keppni á HM fyrir ári síðan og unnu strákana okkar aftur á dögunum. Er ekki kominn tími á að fagna sigri gegn Króötum og taka brons í leiðinni?

„Aðalmálið fyrir okkur er að við viljum ná bronsinu og klára þetta þriðja sæti. Króatar standa í veginum, en það er enginn hefndarhugur þannig séð. Við viljum gera eins vel og við getum. Ef við spilum okkar varnarleik og okkar sóknarleik erum við mjög góðir. Við viljum ná þangað og teljum að það muni gera það að verkum að við náum að vinna leikinn,“ segir Arnór.

Viðtalið má sjá í spilaranum.