„Hel­víti dýrt í leik eins og þessum“

„Við vorum að spila um medalíu og við náðum því ekki þannig það segir sig bara sjálft. Það vantaði aðeins upp á í dag og við vorum að elta Króatana allan leikinn. Kannski besta lið í heimi að stjórna leikjum og þess vegna fórum við aðeins í það að reyna að mölva upp leikinn. Ég fékk hann svo sem í þann farveg sem ég vildi.“

„Það er auðvelt að líta til baka og horfa á að það eru ábyggilega tíu frábær færi sem fara í súginn og það er helvíti dýrt í leik eins og þessum.“

Þá var Snorri alveg með það á hreinu hvað veldur því að íslenska liðið á í stökustu vandræðum með það króatíska.

„Eru þeir ekki bara góðir? Þeir voru í öðru sæti í fyrra á HM og þriðja sæti núna þannig það er kannski ein skýringin. Við erum að tapa tveimur leikjum á móti þeim með einu marki. Við erum ekki lengra frá þeim en það.“

„Við ætluðum aðeins að fara framar, en þá fundu þeir línuna og þá varð aftur eitthvað svona óöryggi. Ég er óánægður með nokkur atriði, sérstaklega í fyrri hálfleik varnarlega. Atriði sem við ætluðum bara að loka, en vorum ekki að gera nægilega vel. Það er mjög fúlt, en bara eins og gengur og gerist. Strákarnir eru samt búnir að vera frábærir og ég get ekki beðið um neitt meira frá þeim.“

En hvernig metur Snorri mótið í heild sinni?

„Akkúrat núna er ég bara fúll. Það segir sig bara sjálft. Við ætluðum okkur meira, en auðvitað er þetta skref fram á við. Liðið er búið að yfirstíga fullt af hindrunum á þessu móti og sýna gríðarlegan karakter. En við breytum því ekki að vonbrigðin eru mikil.“

Að lokum segist hann ætla að skoða það hvaða skref liðið þarf að taka til að komast enn lengra.

„Það er ábyggilega bara eitt og annað, ég kíki bara á það í rólegheitum. Ég er ekki með eitthvað eitt svar við því. Við þurfum bara að halda áfram að reyna að þróa okkur og bæta okkur því okkur langar í meira og ég held að við höfum sýnt það að það er innistæða fyrir því.“