Mið­flokkurinn býður fram í Vest­manna­eyjum

Þetta kemur fram í fréttatilkynningu frá Miðflokknum.

„Ákveðið hefur verið að bjóða fram lista Miðflokksins í Vestmannaeyjum í komandi sveitarstjórnarkosningum. Var þetta ákveðið í framhaldi af fjölsóttum stjórnmálafundi Miðflokksins í Eyjum í ársbyrjun og eftir ákall bæjarbúa í þá veru,“ segir meðal annars í tilkynningunni.

Þá verða frambjóðendur flokksins kynntir hver á fætur öðrum á næstu dögum á Facebooksíðu Miðflokksins í Vestmannaeyjum og eru áhugasamir hvattir til að setja sig í samband við Miðflokksdeild Vestmannaeyja þar sem Guðni Hjörleifsson er formaður.

Í síðustu sveitarstjórnarkosningum fengu þrír flokkar kjörna fulltrúa í bæjarstjórn Vestmannaeyja, Eyjalistinn og Fyrir Heimaey sem saman mynda núverandi meirihluta, og Sjálfstæðisflokkurinn sem er í minnihluta.