Fara fram á gæslu­varðhald yfir starfs­mönnum Hraun­búða

Þetta segir Jón Gunnar Þórhallsson, yfirlögregluþjónn lögreglunnar á Suðurlandi, í samtali við fréttastofu. Greint var frá því í gær að tveir hefðu verið handteknir í tengslum við rannsókn á andláti konu á sjúkrastofnuninni. Samkvæmt heimildum fréttastofu var konan komin vel á tíræðisaldur.

Samkvæmt heimildum fréttastofu eru hinir handteknu starfsmenn hjúkrunarheimilisins Hraunbúða og annar þeirra yfirmaður á stofnuninni. Jón Gunnar kveðst ekkert geta staðfest í þeim efnum.

Lögreglan á Suðurlandi fer með rannsókn málsins þrátt fyrir að það heyri undir lögregluna í Vestmannaeyjum. Í samtali við fréttastofu í morgun sagðist Jón Gunnar ekki geta gefið upp ástæður þess að embætti hans var falin rannsóknin en sagði að rannsóknin snerist að því hvort andlátið hafi borið að með saknæmum hætti. Samkvæmt heimildum fréttastofu var ákveðið að fela öðru embætti rannsóknina vegna tengsla yfirmanns hjá lögreglunni í Eyjum við hina látnu.

Þá hefur embætti Landlæknis andlátið til skoðunar og sagði Kjartan Hreinn Njálsson, aðstoðarmaður Landlæknis að embættinu hefði verið tilkynnt um alvarlegt atvik en gat ekki tjáð sig að öðru leyti.

Hjúkrunarheimilið Hraunbúðir heyrir undir Heilbrigðisstofnun suðurlands og í samtali við fréttastofu í morgun við Díönu Óskarsdóttur, forstjóra Heilbrigðisstofnunar Suðurlands, kom fram að málið hefði komið á hennar borð um helgina. 

Hún vildi að öðru leyti lítið tjá sig um málið en sagði málið viðkvæmt og að stofnunin leggði mikla áherslu á samstarf við lögregluna. Hún sagði að á þessari stundu væri einblínt á líðan starfsfólks og þeirra sem málinu tengjast.