Brand miðlar málum eftir föst skot Al­freðs

Alfreð nafngreindi engan þegar hann skaut á gagnrýnendur í viðtali við Bild en þýskir miðlar segja ljóst að hann hafi verið að tala til fyrrverandi landsliðsmannanna Stefan Kretzschmar, Pascal Hens og Michael Kraus sem saman stýra hlaðvarpinu Harzblut.

„Við vitum öll að þeir hafa ekki mikið vit á þessu. Þeir sem eru með hlaðvarp þurfa að hafa eitthvað að tala um í hverri viku. Enginn þeirra hefur verið þjálfari. Ég veit hvernig taktískur skilningur þeirra er. Og enginn þeirra spilaði í vörn á sínum tíma,“ sagði Alfreð við Bild eftir úrslitaleikinn við Danmörku.

Hlaðvarpstríóið hraunaði yfir Alfreð eftir 30-27 tapið óvænta gegn Serbíu snemma móts, sem að lokum hafði engin áhrif á gengi þýska liðsins, og Kraus sagði til að mynda: „Alfreð, hann þjálfaði hörmulega. Hann þjálfaði hörmulega. Þið getið skrifað það niður.“

„Það er bara þannig að ef við eigum að einhverju leyti slakan leik þá eru þessir uppskafningar tilbúnir að níða okkur,“ sagði Alfreð við Bild.

„Rétt hjá Alfreð“

Heiner Brand, sem stýrði hlaðvarpstríóinu í þýska landsliðinu um árabil og var með Hens og Kraus í heimsmeistaraliði sínu árið 2007, tjáði sig um þetta mál við Sport 1 og vildi nú reyndar helst að öll dýrin í skóginum gætu verið vinir.

„Þeir komu með gagnrýni eftir leik þar sem var klárlega ástæða til að gagnrýna. Ef að menn starfa sem sérfræðingar á stórmóti þá þurfa þeir að segja sína skoðun,“ sagði Brand sem er hins vegar sammála Alfreð að miklu leyti.

„Þessir þrír eru handboltasérfræðingar en það er rétt hjá Alfreð að þeir hafa aldrei þurft að taka neinar ákvarðanir. Það er ansi ólíkt að horfa á leikinn eða að standa þarna sjálfur og þurfa að taka ákvarðanir,“ sagði Brand sem vill eins og fyrr segir að menn slaki nú á.

„Við ættum ekki að leyfa þessu að verða að neinu meira, hvorugir aðila, heldur gleðjast yfir árangri Þýskalands. Við viljum ekki opna aðra ormagryfju og velta vöngum yfir því hverjum sé um að kenna fyrir einhverja hluti og hverjum ekki.“