Fjórum hent úr húsi eftir hópslags­mál

Lætin öll má sjá á myndbandinu hér að neðan en þau hófust eftir að Moussa Diabate frá Charlotte braut á Jalen Duren.

Þeir Diabate og Duren fóru reiðir hvor að öðrum og skullu höfuð þeirra saman. Halda þurfti svo í Diabate þegar hann reyndi að kýla Duren, áður en fleiri leikmenn tóku þátt í slagsmálunum.

Miles Bridges sást til að mynda kýla Duren og þá kom Isaiah Stewart aðvífandi til að svara fyrir sinn mann, tók Bridges í lás og virtist ná að kýla hann nokkrum sinnum.

Alls stóðu áflogin yfir í um hálfa mínútu en tóku loks enda þegar jafnvel lögregluþjónar voru mættir út á gólfið.

Diabate, Duren, Stewart og Bridges var öllum vísað úr húsi, og reyndar fylgdi Charles Lee þjálfari Charlotte sömu leið í fjórða leikhluta eftir reiðiöskur sín að dómara.

Tilfinningarnar brutust út

„Tilfinningarnar voru miklar. Auðvitað myndum við vilja að þetta snúist bara um körfubolta en stundum gerast hlutir. Það voru bara allir að leggja allt í sölurnar,“ sagði Duren eftir leik.

„Þetta er ekki í fyrsta sinn sem menn reyna að vera extra agressívir á móti okkur og tala á móti okkur, hver sem ástæðan er. Þegar allt kom til alls þá varð tilfinningahitinn of mikill og mönnum hljóp kapp í kinn. Það gerist,“ sagði Duren.

Bridges tjáði sig á Instagram og bað stuðningsmenn Charlotte og félagið allt afsökunar. Hann myndi þó alltaf verja liðsfélaga sína.