Toppliðið sótti tvö stig til Grinda­víkur

Njarðvíkurliðið var að vinna sinn þriðja deildarleik í röð og heldur áfram tveggja stiga forskoti á toppnum.

Brittany Dinkins var með 24 stig, 14 fráköst og 6 stoðsendingar fyrir Njarðvík í kvöld og Danielle Rodriguez bætti við 14 stigum, 14 fráköstum og 7 stoðsendingum. Hulda María Agnarsdóttir og Inga Lea Ingadóttir komu báðar með tíu stig inn af bekknum.

Farhiya Abdi var með 21 stig og 8 fráköst fyrir Grindavík og Abby Beeman var með 14 stig. Isabella Ósk Sigurðardóttir skoraði 9 stig og tók 12 fráköst.

Grindavíkurliðið hefur tapað fjórum síðustu deildarleikjum og er í neðsta sætinu í efri hluta deildarinnar en þetta var fyrsta umferðin eftir að deildinni var skipt upp.

Grindavík byrjaði vel, komst mest níu stigum yfir og vann fyrsta leikhlutann 26-20. Njarðvíkurliðið var komið fjórum stigum yfir í hálfleik, 39-35, eftir góðan annan leikhluta.

Njarðvíkurkonur voru síðan sterkari í seinni hálfleiknum og lönduðu mikilvægum sigri í baráttunni um deildarmeistaratitilinn.