Ein og hálf milljón í sekt vegna villandi aug­lýsinga

Málið hófst er annað hvalaskoðunarfyrirtæki á Húsavík, Gentle Giants-Hvalaferðir ehf., sendi Neytendastofu kvörtun vegna auglýsinga Norðursiglingar. Sett var út á notkun fyrirtækisins á hugtökum á við carbon neutral (kolefnishlutlaust), eco-friendly (umhverfisvænt) og silent whale watching (hljóðlát hvalaskoðun).

Þetta er í þriðja sinn sem kvartað er yfir því að Norðursigling hafi gerst sekt um að blekkja neytendur en Neytendastofa hefur áður tekið afstöðu í máli Norðursiglingar árin 2012 og 2017. Í báðum ákvörðununum taldi Neytendastofa rétt að banna fyrirtækinu að nota fullyrðingar í markaðsefni sínu.

„Sýni þetta hinn skýra brotavilja fyrirtækisins í að blekkja neytendur og að hafa ákvarðanir Neytendastofu að litlu sem engu,“ segir í ákvörðun Neytendastofu.

Ósætti milli fyrirtækjanna tveggja

Í kvörtun Gentle Giants segja þau auglýsingarnar og annað markaðsefni vera rangar, ófullnægjandi og villandi. Þær hafi áhrif á eftirspurn eftir þjónustu Norðursiglingar, á þeirra kostnað. Flestir bátar fyrirtækisins gangi fyrir olíu og gefi því frá sér hljóð líkt og aðrir bátar.

Rafmagnsbátur í eigu Norðursiglingar sé þá sjaldan notaður.

Öllum ásökununum er neitað í svari Norðursiglingar og segjast þau leggja mikið upp úr því að bjóða eins umhverfisvænar ferðir og unnt sé. Þau hafi hlotið vottanir vegna umhverfisstefnu og hljóti félaginu að vera heimilt að auglýsa það sem það standi fyrir.

Lýsingarnar á starfsemi Norðursiglingar í kærunni séu fráleitar og auglýsingarnar teknar úr samhengi.

Villandi markaðssetning

Neytendastofa mat markaðsefni Norðursiglingar og taldi fullyrðingarnar vera villandi fyrir neytendur. Því er Norðursiglingum gert skylt að greiða stjórnvaldssekt upp á eina og hálfa milljón króna vegna brotsins.

Fyrirtækinu er einnig bannað að nota áðurnefndar fullyrðingar í markaðs- og kynningarefni þar sem það sé villandi fyrir neytendur. Markaðsefnið gefi með villandi hætti til kynna að þjónusta fyrirtækisins hafi minni skaðleg áhrif á umhverfið en vara eða þjónusta keppinauta.