Almar og fé­lagar með augu allra á sér annað kvöld

Ástæðan er að Miami-skólinn er búinn að vinna alla 28 leiki sína á tímabilinu og er eina ósigraða liðið sem er eftir í 1. deild bandaríska háskólakörfuboltans. Liðið hefur reyndar verið það eina ósigraða í nokkrar vikur og heldur áfram að vinna leiki sína öllum að óvörum.

Miami-háskólaliðið er nú komið upp í 21. sæti á styrkleikalistanum og hefur ekki verið hærra síðan að liðið komst fyrst á listann um áramótin, en það var í fyrsta sinn á þessari öld þar sem karlakörfuboltalið Miami University er meðal 25 bestu háskólaliða Bandaríkjanna.

Í 28. sigrinum í röð vann Miami tíu stiga sigur á Eastern Michigan, 74-64. Þeir eru aðeins sjöunda liðið síðan NCAA-mótið var stækkað í 64 lið árið 1985 til að ná að byrja tímabilið 28-0.

Liðið lengdi sigurgöngu sína á útivelli í þrettán leiki í heildina og í tólf leiki á einu tímabili en hvort tveggja er það besta í sögu liðsins. Miami bætti einnig met liðsins fyrir flesta sigra á einu tímabili í 28 en fyrra metið var 25 sigrar á síðasta tímabili.

Almar Orri kom að venju sterkur inn af bekkjum en hann var með 12 stig á 20 mínútum og tók auk þess fimm fráköst. Almar er með algjört skotleyfi en hann reyndi tólf skot á þessum tuttugu mínútum. Eins og má sjá hér fyrir neðan þá átti Almar flottustu tilþrif síðasta leiks þegar hann tróð boltanum í körfuna með tilþrifum.

Nú verða öll augu á Almari og félögum annað kvöld þegar liðið spilar sinn 29. leik á tímabilinu en sá leikur er á útivelli á móti Western Michigan.