Auka vægi VAR á HM

Aðgerðir til að bregðast við tapi á hraða í leikjum og til að draga úr tímasóun verða einnig kynntar. Þar á meðal verður sérstakur tímarammi með niðurtalningu fyrir markspyrnur, innköst og skiptingar.

Þetta var kynnt af IFAB, sem hefur umsjón með knattspyrnulögunum. Samtökin samþykktu tillögurnar á aðalfundi sínum í gær.

Breytingarnar taka gildi 1. júní og eiga við um tímabilið 2026-27. Þær verða því komnar í gagnið þegar HM hefst í júní.

IFAB samþykkti einnig frekari tilraunir með hugsanlegar breytingar á rangstöðu og að ráðfæra sig um aðgerðir til að berjast gegn því að leikmenn hylji munninn þegar þeir mæta andstæðingum í leikjum.

Það er til komið eftir meint kynþáttaníð Argentínumannsins Gianluca Prestianni í garð Vinicius Junior í leik Benfica og Real Madrid á dögunum.

Alþjóðasambandið FIFA hefur eindregið stutt útvíkkun á umfangi VAR þegar það getur fljótt leiðrétt ákvarðanir sem eru greinilega rangar.

Margar evrópskar deildir höfðu þó sagt að aðgerðir sem gætu aukið tafir væru ekki ásættanlegar.

Það átti sérstaklega við um hornspyrnur.

FIFA var staðráðið í að endurskoða hornspyrnur á HM og barðist eindregið fyrir því. Þar sem deildirnar eru á móti því geta þær valið hvort þær samþykki að skoða hornspyrnu með VAR á næsta ári.

Ekki er búist við að enska úrvalsdeildin geri það. Talið er að UEFA sé einnig á móti því, en ítalska Serie A mun líklega samþykkja það.

Meiri stuðningur var við þá hugmynd að VAR ætti að skoða ranglega dæmd seinni gul spjöld.

Fyrr í þessum mánuði var varnarmaður Juventus, Pierre Kalulu, rekinn af velli með annað gult spjald eftir að Alessandro Bastoni, leikmaður Inter Milan, féll til jarðar eftir litla snertingu.