„Þegar liðs­félagar þínir hafa trú á þér þá kemur sjálf­s­traustið“

Hún var ansi lítillát í viðtali eftir leik og vildi ekki gera of mikið úr eigin frammistöðu heldur hrósaði liðsfélögum sínum.

„Ég vil bara hrósa liðsfélögum mínum fyrir að vera duglegar að finna mig og hafa trú á mér. Þar byrjar þetta. Þegar liðsfélagar þínir hafa trú á þér þá kemur sjálfstraustið og fer alveg í botn og þá geturðu gert það sem ég gerði hérna í kvöld.“

Jamil Abiad, þjálfari Vals, talar alltaf um mikilvægi varnarleiksins í öllum viðtölum. Stone tók undir að þar væri grunnurinn.

„Engin spurning. Þetta byrjar allt í vörninni. Við fáum stopp og fáum svo auðveldar körfur í kjölfarið þar sem við finnum opin færi. Vörnin spilar án vafa stóran part.“

Það var ekki nóg með að Stone skoraði rúman helming stiga Vals heldur tryggði hún liðinu framlengingu og skoraði svo öll stig Vals þar nema tvö. Hún sagði að hún hefði í raun lítið pælt í því hversu mikið hún var að skora.

„Þetta kemur bara af sjálfu sér. Ég var ekki einu sinni búin að fatta að ég hefði skorað svona mikið í lokin. Mér leið bara vel og ég var í góðu flæði. Liðsfélagar mínir létu mig hafa boltann og leyfðu mér að gera mitt.“