Þjálfari Almars lofar að mæta á sund­skýlu ef þeir vinna

Almar Orri Atlason og félagar spila lokaleikinn á móti Ohio Bobcats í kvöld en svo tekur við úrslitakeppni MAC-deildarinnar.

Það er mikil umræða um þennan óvænta árangur Miami í bandarískum fjölmiðlum. Lokaleikurinn verður í beinni á ESPN2.

Miami OH er síðasta ósigraða liðið í háskólakörfuboltanum og ef þeir klára deildarkeppnina ósigraðir mun þjálfari þeirra, Travis Steele, klæðast sundskýlu á valdaginn (e. Selection Sunday) til að þakka sundliðinu fyrir stuðninginn.

Hann gaf það loforð í sjónvarpsviðtali fyrir nokkru en síðan hefur lið hans unnið fimm leiki til viðbótar. Þá var liðið með 25 sigra í röð og ekkert tap en núna eru sigurleikirnir orðnir þrjátíu og enn hefur Miami-skólinn ekki tapað leik.

Sundlið skólans mætti á leiki körfuboltaliðsins á sundskýlunni fyrr í vetur og studdi þar frábærlega við bakið á sínu liði. Nú lofar Steele því að launa þeim greiðann og ýta undir hungur sinna manna í að vinna lokaleikinn með því að mæta á sundskýlu í sjónvarpið ef þeir klára deildarkeppnina taplausir. 

Liðið hefur unnið alla leiki sína í deildarkeppninni og nú er bara einn leikur eftir fyrir úrslitakeppnina en lokaleikurinn er á móti Ohio í kvöld.

Almar Orri hefur spilað alla þrjátíu leikina og er með 10,5 stig að meðaltali í leik sem er það fimmta mesta í liðinu. Hann hefur skorað 55 þrista og er með 38 prósent nýtingu fyrir utan þriggja stiga línuna og áttatíu prósent nýtingu á vítalínunni.

Steele er á sínu fjórða ári með Miami-skólaliðið og liðið hefur undir hans stjórn hækkað sigurhlutfall sitt á hverju ári, fór úr 38 prósentum, í 47 prósent, í 73 prósent og er nú með 100 prósenta sigurhlutfall.